Marso 16 - 31, 2010

Kami sa Pilipino Express ay taos-pusong nakikiramay kay ‘Nay Cristy at kaniyang pamilya sa pagyao ng kaniyang mahal na Nanay noong Marso 7, 2010.

Kris Aquino – Hanggang sa pakikiramay ay taklesa pa rin

Kapag may pumapanaw tayong mahal sa buhay ay lumalambot ang ating puso. Kinalilimutan na natin ang sugat ng nakaraan. Parang Pasko ang lamay na nagpapalimot sa mga sama ng loob.

Martes ng gabi, habang inaasikaso namin ang mga nakikipaglamay, ay mayroon kaming narinig. Nandoon daw si Kris Aquino, kasama si Jojie Dingcong. Nakita namin ang gumuhit na pagtataka sa mukha ng mga nandoon. Kung mayroon man kaming hindi inaasahang darating sa burol ng aming ina ay si Kris iyon.

Mas matanda pa nang ilang buwan kaysa sa kanilang anak ni James Yap na si Baby James ang aming hindi pagkakaunawaan. Wala mang naririnig na giyera ng mga salitaan namin ang publiko ay magkalayo ang bituka namin ni Kris. Nag-ugat iyon sa personal naming pagsasabi sa kaniya tungkol sa relasyon nina James Yap at Hope Centeno noong 2006 na minasama niya at ginamit pa laban sa amin.

Hulyo ng taong 2007, namayapa ang aming ama. Nagpadala siya ng mensahe sa amin sa text. Pinasalamatan namin siya, ginantihan ng pagpapahalaga sa kaniyang ginawang pakikiramay. Pero hindi siya nagpunta sa lamay ng aming ama at kahit isang talulot lang ng bulaklak ay wala rin siyang ipinadala.

Namayapa ang kaniyang ina. Sadya kaming hindi nagpunta sa burol, kahit pa ang buong sambayanan yata ay sumisilip na sa bangkay ng namayapang si Tita Cory.

Respeto ang aming interpretasyon sa ginawa naming desisyon. Hindi namin gugustuhing sa gitna ng kaniyang pagdadalamhati ay mabigyan pa namin ng sama ng loob si Kris.

Noong dumalaw siya sa lamay ni Nanay ay isinumbat niya iyon sa amin, “O, ako, nagpunta ako dito, pero ikaw, you didn’t go to my mom’s wake.” Kahit daw hindi kami nagpunta sa lamay ng kaniyang ina ay nag-effort siyang dumalaw sa burol ni Nanay. Isang komento na para sa amin ay hindi hinihingi ng pagkakataon.

Wala man kami sa lamay ng namayapa niyang ina ay hindi naman kami kinapos ng pakikidalamhati nang malayuan. Naging laman ng aming mga kolum sa loob nang halos dalawang linggo ang kadakilaan ng dating pangulo. Isinisi iyon ni Kris sa kaniyang kasama. Bakit daw hindi nito sinabi sa kaniya na marami pala kaming isinulat tungkol kay Tita Cory?

Hanggang sa kaniyang pakikiramay ay bitbit ni Kris ang pagiging intrigera at taklesa. Bakit daw ang mga bulaklak na padala ng mga taga-ABS-CBN ay nasa ibaba lang, bakit daw wala sa loob ng chapel?

Pinahahalagahan namin ang pagdalaw ni Kris sa lamay ni Nanay, pero hindi ganoon ang interpretasyon ng mas nakararaming nandoon. Ayon sa mga ito ay ginawa iyon ni Kris dahil panahon ng eleksiyon.

Ruffa Gutierrez – May bagong tahanan na sa TV5

Pagkatapos ng halos isang taon at kalahati ng hindi pagkikita ay muling nagkrus ang landas namin ng magandang actress-beauty queen na si Ruffa Gutierrez.

Parang malayo na parang malapit din kami sa isa’t isa sa loob nang mahabang panahong iyon. Nagkukumustahan kami palagi sa text. At noong nakaraang Pasko ay nag-abala pa siyang magpadala ng regalo sa amin.

Ang huli naming pagkikita ni Ruffa ay noong pareho pa kaming nasa ABS-CBN. Pero mula noong ibagsak na sa aming ulo ang tabak ng suspensiyon ay hanggang sa text na lang ang aming komunikasyon. Mapagbiro talaga ang tadhana, sino ang mag-aakala na pagkatapos pala ng isang taon at kalahati ay muli kaming magtatagpo ni Ruffa sa isang situwasyon at sa isang lugar na napalilibutan din ng mga camera at ilaw, na ituturing na naming bagong tahanan?

Maraming mensahe ang aming dinedma. Para kaming bingi kapag may mga nagtatanong, “totoo raw bang magbabalik-telebisyon na kami at mapapanood na sa ABC-5?”

Isang napakainit na hapon noong nakaraang buwan ay nagpunta sina Noel Ferrer at Percival Intalan, mga batambatang ehekutibo ng TV5, sa aming gallery.

Hindi sila basta dumalaw lang. May sadya sila na ang naging resulta ng pag-uusap pagkatapos lang ng dalawang linggo ay ang dalawang talk shows na gagawin namin para sa network.

Isang pang-araw-araw at isang lingguhan. Makakasama namin sa una si DJ Mo Twister at ang mga dati nang mayhawak ng trono na sina Alex Gonzaga at IC Mendoza. Sa pangalawa naman ay magkakasama kami nina DJ Mo at Ruffa Gutierrez na nagbitiw na sa The Buzz.

Manny Pangilinan – Desididong palawakin ang ABC-5

Sa industriya ng negosyo at kalakal ay kilalang-kilala na ang pangalan ni Mr. Manny Pangilinan. Corporate genius ang ikinakambal sa paglalarawan sa kaniya. Kahit daw putik ay kayang gawing ginto ng henyong negosyante.

Si Mr. Manny Pangilinan na ang may-ari ng ABC-5 tulad ng PLDT, Smart, malaking porsiyento ng Meralco at iba pang malalaking korporasyon. Desidido siya at ang kaniyang mga kaalyado para palawakin ang TV5, ang dahilan kung bakit noong gawin namin ang ID ng istasyon ay nagulantang kami sa dami na pala ng mga artistang nasa kanilang pangangalaga ngayon.

Pinatototohanan namin ang rebelasyon ni Ruffa Gutierrez na sa pinansiyal na aspeto ay matayog ang lipad ng saranggola ni Mang Manny. Hindi na kami magbabanggit pa ng mga numero at pigura, pero ang kanilang alok ay hindi kayang pantayan ng kahit anong network.

At sa pictorial at station ID shoot pa lang ay ramdam na ramdam na namin ang maaliwalas at marespetong kapaligiran sa bakuran ng ABC-5. Walang malaki at maliit na personalidad sa kanilang teritoryo. Hindi rin uso sa kanila ang sipsipan at palaparan ng papel para lang lumutang ang presensiya.

May punto ang ibinulong sa amin ng isang tagaroon, “Kumbinasyon ng Kapamilya at Kapuso ang pagtratong matitikman mo dito.”

Nora Aunor – Binigo ang mga Noranians sa Canada

Balitang-balita ang ginawang pagpaparetoke ng mukha ni Nora Aunor. Marami ang nagsasabing bumata siya nang sampung taon. Ito ay ikinasigla ng aktres at naging dahilan upang maging excited sa kaniyang mga concerts sa iba’t ibang lugar sa Canada.

Subalit ayon sa aming source na kaibigan ng prodyuser sa Canada, pinasakit talaga ni Nora ang ulo ng prodyuser. Tatlo ang naka-planong concert ni Nora sa Canada. Ang una ay noong March 5 sa Massey Theatre sa New Westminster sa British Columbia.

“Nabigo ang mga nanood dahil hindi nila napanood ang pinakahihintay nilang superstar. Sa halip ay dalawang oras at kalahati ng front act ang kanilang nakita, walang Nora. Pagkatapos ng dalawang oras at kalahati ay humihiyaw na ang mga nanood sa inis, doon na lumabas si Nora. Kinuha niya ang mikropono at sinabing hindi siya handang mag-perform ng gabing iyon. Nangako ang superstar na babalik siya sa Abril kasama ang kaniyang mga anak sa concert,” sabi ng aming kaibigan.

“Kahit mga die-hard fans ni Nora ay nagreklamo at hindi naniwala sa pangakong babalik siya sa Abril. Kahit daw bumalik ay hindi na sila manood.”

Noong una pa man ay problemado na ang prodyuser ni Nora sa Canada dahil ayaw gumalaw ng bentahan ng tickets.

Ayon pa sa aming source, walo ang alalay ni Nora noong dumating sa Vancouver Airport noong March 4, at kasama pa rin si John Rendez. Napansin daw nila na parang hindi mapakali at para raw “high” ang superstar. Ayaw daw sundin ang nakasulat sa kontrata at ni ayaw makipag-rehearse sa banda.

Kinausap tuloy nila ang abugado ni Nora at ito ang nag-utos kay Nora na sundin ang usapan. Hindi rin daw maintindihan ang mga sagot ng superstar sa media noong nag-meet and greet sila.

Iyon ang mahirap kapag nadagtaan na ang imahe ng isang artista. Hindi nakaganda kay Nora ang mga kuwentong kumalat noon na pagkatapos niyang kunin ang down payment ay hindi na siya sumisipot. Gagalaw pa kaya ang benta ng tickets para sa kaniyang mga concert lalo na ngayong kumakalat na naman ang hindi magagandang kuwento tungkol sa kaniya?