Disyembre 1 - 15, 2012

	KC Concepcion
	Claudine Barretto
	Ruffa Gutierrez
	Coco Martin
	Willie Revillame
	Andi Eigenmann
	Regine Velazquez

KC Concepcion – Lalaking-lalaki ang bagong boy friend

Makahulugan ang binitiwang paglalarawan ni KC Concepcion sa lalaking nagpapaligaya sa kaniya ngayon. Walang halong malisya ang kaniyang sinabi, pero talagang hindi maiiwasang lagyan ng nanonood-nakikinig, dahil tungkol sa pagkalalaki na ang pinag-uusapan.

Lalaking-lalaki raw ang kaniyang karelasyon ngayon. Kahit anong anggulo raw sukatin ay tunay na lalaki ang banyagang nagpapasaya ngayon sa anak ni Sharon Cuneta, kaya hagip na naman doon ang kaniyang ex na si Piolo Pascual.

Matagal nang naglantad ng saloobin si KC tungkol sa nakaraan nilang relasyon ng guwapong aktor, pero hanggang ngayo’y hindi pa rin nakaaahon si Piolo sa naganap. Anuman ang pruwebang ilabas ni Piolo para idiin ang kaniyang pagkalalaki ay nananatiling kuwestiyonable iyon para sa mas nakararami.

Nakita ng mga kaibigan namin si KC kailan lang sa London, may mga kasama siyang kaibigan. Ayon sa aming source ay lutang na lutang ang kagandahan ni KC kahit marami pa siyang kasamang tisay.

Maligaya na ngayon ang dalaga pero ang ex niyang si Piolo ay naghahanap pa rin. May kuwentong lumabas na si Shaina Magdayao raw ang nililigawan ngayon ng aktor, isang kuwentong pinagtataasan lang ng kilay ngayon ng ating mga kababayan. Kulang na lang na sabiin pa ng mga ito na wala naman sanang lokohan!

Claudine Barretto – Sinayang ang pinaghirapang career

Nakakalungkot ang kinahinatnan ng napakagandang career noon ni Claudine Barretto. Makapangyarihan siya noon, puwede siyang umayaw sa isang proyekto kapag ayaw niya ang artistang makakasama niya. Pro ngayon ay dumating siya sa punto na kahit sino na lang ang itambal sa kaniya ay puwede na.

At kung kailan naman siya dumating sa ganoong sitwasyon ay saka walang nagbibigay sa kaniya ng trabaho. Mukhang sarado na ang pintuan para sa kaniya ng nilayasan niyang ABS-CBN. Hindi naman siya nagtagumpay sa kaniyang paglipat sa GMA-7. At ano naman kaya ang naghihintay na proyekto sa kaniya sa TV5?

Si Claudine ang eksaktong ehemplo ng isang personalidad na hindi nag-alaga sa kaniyang career. Nakahain na sa kaniya noon ang magagandang oportunidad, pero hindi pa niya iyon inalagaan sa pag-aakala na wala nang paglubog ng araw sa kaniyang propesyon.

Nakakalungkot isipin na napakahaba ng panahong ginugol niya para makilala. Matindi rin ang pinagdaanan niyang labanan, pero humantong iyon sa ganito lang.

Pinabayaan niya ang propesyonalismong naging puhunan niya noong una. Pati ang kaniyang katawan ay napabayaan na rin niya. Mabilis din siyang nagpapadala sa madayang emosyon na nagsadlak sa kaniya sa kung ano-anong kaguluhan at kontrobersiya.

Alam ni Claudine Barretto kung saan-saang aspeto siya lumabis at nagkulang. Walang dapat sisihin sa kinahinatnan ng kaniyang career kundi siya lang. Sayang na sayang talaga.

Ruffa Gutierrez – 16 na buwan nang walang karelasyon

Pagkatapos ng mahabang panahon ay nagkita kami ni Ruffa Gutierrez sa Christmas ID shoot ng TV5. Maganda pa rin si Ruffa, malaki ang ipinayat niya. Mas bumagay rin sa kaniya ang kulay ng kaniyang balat ngayon na kinalabasan ng kaniyang pagpapa-tan.

Parang walang anumang nangyari sa mahaba at masarap naming kuwentuhan noong Huwebes ng gabi. Siya pa rin ang dating kasama namin noon sa Paparazzi na mahilig makibalita tungkol sa mga kasamahan niyang artista.

Ayon kay Ruffa ay labing-anim na buwan na siyang loveless ngayon, as in wala talaga, kahit pa hindi naman siya nawawalan ng mga manliligaw.

Pero ngayon daw niya nararamdaman ang kaligayahan kahit wala siyang boyfriend. Hindi nga naman masusukat ang sayang ibinibigay sa kaniya nina Lorin at Venice, ang kaniyang mga anghel na napakabilis ng paglaki.

Abala raw ngayon si Tita Annabelle sa Cebu para sa kandidatura nito. Ikinaliligaya iyon ni Ruffa dahil may ibang pinagkakaabalahan ang kaniyang mommy ngayon, kaya hindi na ito tweet nang tweet.

Iyon ang magandang katangian ni Ruffa Gutierrez. Hindi siya nagtatago ng anumang galit o kahit sama lang ng loob sa kaniyang puso, kaya naman nakikita rin iyon sa kaniyang itsura.

Coco Martin – Isang deadbeat dad para sa anak na si Nicole

Kahit sinong ina ay makikisimpatya sa damdamin ng magaling na aktres na si Katherine Luna. May anak sila ni Coco Martin, si Nicole na pitong-taong gulang na ngayon. Minsan lang nakita ng magaling na aktor ang kanilang anak at pagkatapos noon ay nawalan na sila ng komunikasyon.

Kapag ang kaniyang panganay na ang nagiging paksa ay napakabilis magsumbong ng puso ni Katherine sa kaniyang mga mata. Napapaluha agad ang magandang aktres. Awang-awa siya kay Nicole, hinamon daw siya noon ng DNA test ng kampo ni Coco at pumayag naman siya pero hanggang doon lang naman ang inabot ng kuwento.

“Iyon ang gusto nila, pumayag naman ako. Malakas ang loob ko sa DNA test dahil sigurado ako kung sino ang ama ng anak ko. Pero mula noon, wala na kaming narinig pa mula sa kanila,” lumuluhang pahayag ni Katherine noong Sabado ng umaga sa Ang Latest.

Doble ang dagok sa kaniya ng sitwasyong ito. Una, nandoon ang pagdududa ni Coco sa kaniyang pagkababae. Ang insinwasyon ng pagdedenay nito tungkol sa kanilang pagkakaroon ng anak ay iba ang dapat managot sa bata at hindi ang aktor.

Ikalawa, masakit para kay Katherine ang pagkakaila ni Coco tungkol kay Nicole. Noong kapanganganak lang kasi niya ay nagpunta pa ang aktor sa kaniya at nagsabing kamukhang-kamukha nito si Nicole sa halos lahat ng anggulo.

Pitong taon na ngayon si Nicole at kung hindi naman natatanong si Katherine ay wala siyang hinahabol na sustento mula kay Coco. Napakasakit ng kaniyang sinabi, “Nakakaawa na nga ang anak ko dahil ikinakaila siya ng tatay niya. Ipagpapalimos ko pa ba naman siya? Masyado nang magiging kaawaawa ang anak ko.

“Nakakaraos naman kami. Nagkakasya naman kami sa kung ano lang ang nandiyan. Okey na po kami doon. Pag napapanood niya si Coco sa TV, nagtatanong siya kung iyon ba ang tatay niya. Oo, sabi ko,” lumuluhang komento ng magaling na aktres.

Napakaginhawa na ng buhay ngayon ni Coco Martin. Kayang-kaya na nitong magsustento ng anak nang sobra-sobra pa sa kung ano lang ang kailangan, pero hindi sinusukat sa ganoon ni Katherine ang ama ng kaniyang anak.

Wala siyang hinihingi. Wala siyang pakialam sa kung anumang mayroon na ngayon ang ama ng kaniyang si Nicole. Isang-isa lang ang gusto niyang mangyari.

“Ang mayakap lang po niya ang anak niya. Ang maramdaman lang po ng anak ko na may tatay siya,” humihikbing pahayag ni Katherine Luna.

Willie Revillame – Tatapatan ba ang Eat…Bulaga sa 2013?

Sa pabugsu-bugsong pagsasalita ni Willie Revillame ngayon sa kaniyang programa ay mayroon nang nabubuong ideya sa isip ng marami. Hindi nga siya aalis sa TV5, pero may malaking pagbabagong mangyayari sa kaniyang show.

Ang sabi ni Willie ay sa January 5 na ang huling araw nila sa Wil Time, Bigtime, unang Sabado iyon ng taong 2013. Pagkatapos noon ay magpapahinga muna ang programa at saka sila babalik.

January 27 ang kaarawan ni Willi. Isang malaking selebrasyon ang magaganap, kaya mayroon siyang sinabi na kung hindi sa January 26 na araw ng Sabado ay Lunes na sila magbabalik.

Ang tanong ngayon ng ating mga kababayan ay magbabago raw ba ang oras ng programa? At kung magbabago nga, totoo bang makikipagsalpukan sila sa Eat…Bulaga, dahil malakas ang ikot ng kuwento na mula sa gabi ay ililipat na sa tanghali ang programa ni Willie.

Andi Eigenmann – Hindi pa tapos ang paternity issue kay Jake at Albie

Akala nami’y matatapos na ang kontrobersiya sa pagitan nina Jake Ejercito at Andi Eigenmann nang magsagutan ang kanilang mga magulang, pero hindi pa pala. Ngayon ay ang dating magkarelasyon na ang nagpapatutsadahan.

Pinanindigan ni Jake na pinagsabay nga ni Andi ang pakikipagrelasyon sa kaniya at kay Albie Casiño. Sinabi rin ng guwapong binata na totoong-totoo ang lahat ng mga kuwentong inilabas ng kaniyang inang si Laarni Enriquez, na sinagot naman agad ni Andi ng “Feeling perfect. Gross!”

Sinabi rin ni Andi na nagpakatotoo lang si Jaclyn Jose sa mga sinabi nito, na ang pakialam lang niya ay ang kaniyang mga sinasabi, hindi ang kung ano ang pinaniniwalaan at gustong panindigan ng kaniyang ex na si Jake.

Siguradong hahaba pa nang hahaba ang istoryang ito dahil pahapyaw lang ang mga pahayag ni Jake na nasa London pa ngayon at nag-aaral. Hindi naman siyempre papayag si Andi na basta na lang siya ilaglag ng binata, kaya lalawak pa ang digmaan nila ng salitaan kapag nagkataon.

Regine Velasquez – Maglilibreng concert para makabawi sa disappointed fans

Nagkuwento sa amin si Congresswoman Lucy Torres-Gomez ng nakalulungkot na nangyari noong nakaraang concert ng Asia’s Songbird na si Regine Velasquez. Kung kailan naman sobrang pinaghandaan ni Regine ang gabing iyon ay saka naman siya nagkasakit at halos mawalan na ng boses.

Napakaespesyal ng nasabing concert para kay Regine dahil iyon ang naghuhudyat sa ikadalawampu’t limang taon niya sa lokal na aliwan, pero may mga bagay ngang hindi natin maaaring pigilan. Tao lang si Regine na nagkakasakit din.

Kuwento ni Cong. Lucy, “Nakakalungkot ang nangyari, but she really tried her best to deliver. I heard, nakatatlong injection siya before and during the show, pero talagang ayaw lumabas nang maayos ang voice niya.

“Umiyak na siya. Hirap na hirap na siyang kumanta. Nalulungkot siya dahil ang feeling niya, eh, na-shortchange ang mga nanood ng show niya na punumpuno naman talaga.

“Napaka-professional ni Regine. Kung iba lang siya, siguro, eh, kinansel na ang show dahil nga sa pagkakasakit niya. But she didn’t disappoint her audience. Sobrang hirap ng pinagdaanan niya pero ginawan pa rin niya ng paraan na makapagpasaya siya,” kuwento ng magandang misis ni Richard Gomez.

Ayon kay Cong. Lucy ay bibigyan ni Regine ng pagkakataon ang kaniyang mga tagahanga na makantahan niya sa paraang hinahanap ng publiko sa kaniya. Buo ang boses, bigay na bigay, masigla ang kaniyang katawan.

“Isa pang nakakatuwa that night, eh, ang guest niyang si Lani Misalucha. Siyempre, di ba, hindi na nga makakanta si Regine, so it could have been a chance para manapaw si Lani, di ba?

“Pero hindi niya iyon ginawa, nakipagsabayan siya kay Regine sa paraang hindi siya nananapaw. Noong mag-more nga ang audience sa kaniya, ang reaction ni Lani, ‘Gabi po ito ni ateng!’

“Napaka-low key ni Lani, ang galing-galing niya,” papuri pa ni Congressowoman Lucy Torres-Gomez sa singer.

Kung maraming nakauunawa sa naganap noong gabi ng concert ni Regine Velasquez ay hindi rin mawawala ang mga taong naghahanap lang ng butas. Natural, napakadaling mamintas-manira ngayon, kaya kahit wala namang nagrereklamo sa kinapos na pagtatanghal ni Regine ay pinalalabas ng mga taong iyon na mayroon.

Huwag na sana nating dagdagan pa ang sobra niyang kalungkutan. Ibayong pang-unawa na lang ang ibigay natin sa kaniya sa pagkakataong ito. Tutal naman ay magtatanghal siya isang gabi nang libre para bumawi sa mga taong nabigo niya noong nakaraang concert niya.

Sikguro, mas maganda kung titigilan na ni Cacai Mitra na tumatayong manager ni Regine Velasquez ang pagpatol sa mga bashers nila sa Twitter. Nag-iinit ang ulo ng kapatid ni Regine sa mga tinatanggap nilang reaksiyon tungkol sa naganap sa huling concert ng Asia’s Songbird.

Mas makagaganda siguro kung pakikiusapan na lang ni Regine ang kaniyang kapatid-manager na huwag nang makipagdiskurso pa sa Twitter. Wala silang panalo doon. Siya ang masisira nang husto kapag inaway pa nang inaway ni Cacai ang mga kababayan nating hindi nakauunawa at away lang talaga ang hanap kaya sila iniinis.

Sa halip na makipagdakdakan si Cacai sa mga bashers nila ay tutukan na lang nila ng pansin ang gagawing concert ni Regine sa lalong madaling panahon para makabawi siya sa mga hindi nasiyahan sa nakaraan niyang concert.

Sila ang may kulang sa usaping ito. Sila ang kailangang bumawi. Kaya anuman ang sabihin ng kanilang mga bashers ay wala na silang magagawa pa kundi ang paghandaan na lang ang gabi na papagitna sa entablado ang isang may boses nang Regine Velasquez para kantahan nang buong ningning ang kaniyang mga tagahanga.

Have a comment on this article? Send us your feedback