Marso 1 - 15, 2010

Erich Gonzales – Hindi totoong nagpa-boob job

Hanggang ngayon ay pinagtatalunan pa rin kung bakit biglang lumaki ang mga dibdib ng magandang young actress na si Erich Gonzales. Hindi raw naman kasi ganoon “kayabang” dati ang kaniyang boobs, pero ngayon ay parang may sariling buhay na. Maraming nagdududa na sumailalim siya sa breast enhancement.

Depensa naman ng isang impormanteng malapit kay Erich ay walang pinagdaanang operasyon ang dalaga. Imposible raw mangyari iyon, dahil kahit minsan naman ay hindi lumiban sa kaniyang halos araw-araw na taping ang batang aktres.

Ang diretsong pahayag ng malapit kay Erich, “Ipit-ipit lang iyon, walang operation, mayroon lang siyang inilalagay na stuff sa bra niya. Iyon ang dahilan kung bakit parang biglang lumaki ang boobs niya,” sabi nito.

Pero mas bumagay kay Erich ang pagkakaroon ng boobs, iyon na lang kasi ang kulang sa kaniya, isa sa pinakamagandang mukha sa showbiz ang dalaga ngayon.

At nakaaarte siya, panlaban ang mga eksena nila ni Jodie Sta. Maria sa Tanging Yaman, hindi rin siya sakit ng ulo ng produksiyon kaya marami siyang proyekto ngayon.

Charice – Mukhang ang ina ang magiging problema

Magaling na singer si Charice Pempengco. Hindi siya dadakilain sa ibang bansa kung wala siyang talento. Pero sa estado niya ngayon ay kailangang bigyang-halaga nilang mag-ina ang pagpansin ng marami nating kababayan.

Hindi nila dapat masamain ang mga suhestiyon at pagpuna. Dumaan din sa ganitong karanasan ang maraming sikat nang singers ngayon na tulad nina Regine Velasquez at Sarah Geronimo. Kaya hindi dapat nagmamaldita ang kaniyang inang si Raquel sa pagsasabing naiinggit lang ang mga namimintas na baduy manamit si Charice.

Kailangang maintindihan ni Raquel na ang kabaduyan ay hindi ginagaya, pinagtatawanan ang ganoon. Kaya ano naman ang ikaiinggit ng mga kababayan natin sa kabaduyang manamit ng kaniyang anak?

Komento ng isang nakausap namin, “Para kasing takaw na takaw silang ipakita ang kung anumang mayroon si Charice. Punumpuno ng beads ang buong katawan niya, napakainit ng klima dito sa Pilipinas, pero balot na balot siya na parang hindi makahinga. Gusto lang nilang ipakita na noong nag-abroad sila, eh, nakabili sila ng leather jacket at boots na kahit hindi naman bagay sa bata, ipinasusuot niya!

“Baduy na baduy tuloy iyong bata, parang minamadali ni Charice ang pagdadalaga niya, iyong nanay na lang sana ang maging baduy, huwag na ang anak, dahil siya ang nagpe-perform!” kumakagat na pagpansin nito sa mag-ina.

Ang tungkol naman sa pagmamaldita ng ina ni Charice ay hindi na bago sa aming pandinig. Gasgas nang tugtugin iyon. Kung ang sarili nga nitong ina ay kayang-kayang pagmalditahan ni Raquel ay ano pa ang maaasahan natin mula sa kaniya?

Kembot Girls – Pinalitan ang ASF dancers ng Wowowee

Nakaalis na kami sa bahay kahapon noong tumawag ang aming impormante tungkol sa biglaang pagre-resign sa Wowowee nina Luningning, Milagring at Mariposa.

Siguradong maraming kuwento at haka-haka na maglalabasan, pero alam ng tatlong dancers ng ASF kung ano ang tunay na dahilan ng pamamaalam nila sa noontime show.

Tantanan na nila ang pagsasabing matagal na silang nababastos sa show, dahil hindi pa patay ang kanilang mga kasamahan sa programa para hindi makapagsalita tungkol sa kanilang pamamaalam.

Pumasok ang Kembot Girls na mas batambata kesa sa kanilang tatlo. Magaganda ang katawan nina Luningning, Milagring at Mariposa, pero kung edad ang pag-uusapan ay mga ate na sila ng bagong grupo.

Ang situwasyon nila ay walang iniwan sa mga boldstars. Bakit nga ba kapag may mga bago nang mukha na mas bata at mas sexy ay pinagpapahinga na ang mga dating reyna ng hubaran. Kailangan nilang tanggapin ang katotohanan na kung magpapatuloy pa rin sila sa paghuhubad ay sangkatutak na pintas lang ang aabutin nila mula sa publiko.

Hindi rin maiiwasan ang mga pagkukumpara. Ano nga ba naman ang panama ng mga may edad na kesa sa mga sariwang-sariwa pa at nakikipaglaban nang sabayan. Nasa ganoong situwasyon ngayon ang tatlong dancers na nagpaalam na sa Wowowee.

Ara Mina – Blooper Queen

Ang mga nalalabi pang araw bago magsimula ang pormal na pagbubukas ng kampanya para sa mga politikong tatakbo sa panglokal na posisyon ay kailangang gamitin ng produktibo ni Ara Mina.

Kailangan niyang magbasa ng mga pahayagan at tumutok sa mga news programs. Kailangan niyang makibalita, para malaman niya kung anu-ano ang nagaganap sa ating bayan.

Hindi siya puwedeng magpa-cute lang sa entablado ng kampanya. Nagdesisyon siyang lumahok sa halalan bilang konsehal sa isang distrito ng Quezon City, kaya kailangang kargado ang kaniyang utak sa pagsisimula ng kampanya.

Nakakahiya kapag naulit na naman ang pinagpipistahang bloopers niya ngayon sa internet. Ni hindi niya alam kung ano ang VFA, wala siyang maisagot tungkol sa kaguluhang naganap sa Maguindanao, kailangan niya ring depensahan ang kaniyang sagot na aprubado siya sa private army at sa iba pang mga isyung hinahalakhakan talaga ngayon ng ating mga kababayan.

Kung bakit naman kasi pumayag sumalang si Ara Mina sa isang panayam na hindi siya nakahanda. Ang akala siguro niya ay kung anu-anong pa-cute na tanong lang ang ibabato sa kaniya ng TV host, tuloy ay naging Blooper Queen siya.

Hindi niya naman kailangang magpakadalubhasa sa pagtitilad-tilad ng mga napapanahong isyu sa ating bayan ngayon. Ang kailangan lang ay ang maging pamilyar siya sa suliranin ng ating bayan ngayon. Kailangang naiintindihan niya ang mga kaganapan.

Si Ara Mina mismo ang naglalapit sa kaniyang sarili para pagtawanan siya at menosin ng ating mga kababayan. Pumapasok siya sa giyera nang wala na siyang baril ay wala pa siyang bala, kaya nagmumukha tuloy siyang katawa-tawa sa mata ng publiko.

Maraming nakapalibot kay Ara ngayon. Kailangang ang mga ito ang gumiya sa kaniya para magsunog ng kilay sa pag-aaral tungkol sa mga problema ng bayan na nangangailangan ng solusyon ngayon. Hindi puwedeng pakyut lang nang pakyut ang kanilang kandidato.

Noong pumasok si Ara Mina sa pag-aartista ay hindi naman siya nakilala bilang matalinong babae. Pisikal lang ang mga katangiang ipinagmamalaki niya, kaya hindi na bago sa mga taga-showbiz ang mga kahinaan niya ngayon.

Pero mayroon siyang inilalapit na pabor ngayon sa kaniyang mga kadistrito. Nanghihingi siya ng boto ngayon para maluklok na konsehala sa kanilang lugar. Kailangang magpakita ng mga katangian ngayon si Ara Mina para pagtiwalaan siya ng kaniyang mga nasasakupan.

Judy Ann Santos – Masama ang loob kay Sen. Jamby

Hawak ni Judy Ann Santos ang lahat ng karapatan para magbigay ng kontra-reaksiyon sa binitiwang pahayag ni Senador Jamby Madrigal na pinagsisisihan nito ang pagkakuha sa serbisyo ng batang superstar noong nakaraang eleksiyon.

Ang senadorang kumakandidato sa panguluhan ngayon (saan daw ba, sa pagiging presidente ng fan club o sa homeowners association?) ay kinaiinisan ng mga tagasuporta ni Juday. Milyun-milyong boto iyon na kahit maliit na porsiyento man lang sana ay makadadagdag sa kakarampot na boto ng senador, pero humulagpos pa.

Mula sa alta-sosyedad ang senadora kaya naging problema nito ang pagbaba sa masa. Si Juday ang naging sagot sa kaniyang problema. Kinuha nitong tagapag-endorso ang aktres. Sumama si Juday sa kaniyang mga pag-iikot sa iba’t ibang probinsiya, nanalo ang politiko.

Natural, masamang-masama ang loob ngayon ni Judy Ann sa politico. Para nga naman kasing binabalewala lang nito ang malaking naitulong niya sa kandidatura nito na humantong nga sa isang silyang inuupuan nito ngayon sa Senado.

Asahan na ang pagsasalimbayan ngayon ng kung anu-anong text joke tungkol sa mga tumatakbo sa panguluhan, siguradong pagpipistahan sila ng buong bayan, tulad na lang ng isang natanggap naming election text joke na ganito ang nilalaman.

Noynoy Aquino – mama’s boy, Manny Villar –Tondo boy, Gibo Teodoro – lover boy, Erap – kanto boy, Gordon – Amboy, Bro. Eddie Villanueva – altar boy at Jamby Madrigal – if I were a boy!

Kris Aquino – Hindi marunong umarte

Nabulabog ang mga tagapamuno ng produksiyon ng tele-seryeng Kung Tayo’y Magkakalayo na pinagbibidahan nang sangkatutak na premyado at sikat na artista, kasama ang TV host na si Kris Aquino, dahil sa mga hindi kagandahang komento ng manonood tungkol sa kaniyang pagganap.

Ayon sa isang mapagkakatiwalaang source na tumawag sa amin kamakailan ay nagkaroon ng posisyon ang produksiyon sa ginanap nilang brainstorming. Babawasan nila ang mga eksena ni Kris, at dadagdagan naman nila ang exposure ng komedyanteng si Pooh at ng tambalan nina Kim Chiu at Gerald Anderson.

Nagulat diumano ang produksiyon sa napakaraming negatibong komento tungkol sa pagganap ni Kris sa mga pahayagan. Bukod pa iyon sa mga kumakalat na negatibong pahayag ng ating mga kababayan sa internet, kaya negdesisyon ang produksiyon na bawasan ang kaniyang mga eksena.

Dagdag na pahayag pa ng aming impormante, “Masyado na kasing pinaniwala ni Kris na aktres siya talaga, believe na believe siya sa acting niya.

“Walang expression ang mga mata niya, iisa lang ang kaya niyang gawin, ang magpalaki ng mga mata niya kapag nagugulat siya, kapag nagagalit siya, kapag umiiyak siya, hanggang doon lang talaga ang alam niya.

“Mayroon ngang nag-e-mail sa staff na there’s something wrong with the structure of her face, mayroong kulang sa mukha niya, iyon ang reason kung bakit hindi talaga siya effective actress,” patuloy ng aming source.

Para hindi na masyadong maapektuhan pa ang tele-serye ay pinagkasunduan ng produksiyon na gamutin iyon sa pamamagitan ng pagbabawas ng mga eksena ni Kris. Mas kokonti ang kaniyang mga eksena ay malaking kabawasan iyon sa negatibong publisidad ng tele-serye.

Nagpauna na agad ang aming source, “Siguradong idedenay ng tropa ang kuwento, pero totoong nangyari iyon sa brainstorming nila, napakarami nila doon para magsinungaling sila nang sabay-sabay tungkol sa pinag-usapan nilang decision!”

Have a comment on this article? Send us your feedback.