Published on

Cristy Fermin

   Marso 16 - 31, 2012

 

 
 
KC Concepcion
 
 
Gabby Concepcion
 
 
Charice
 
 
Mommy D. & Manny Pacquiao
 
 
Jennylyn Mercado
 
 
Bb. Gandanghari
 
 
Dra. Vicki Belo
KC Concepcion – Magalang, may dignidad, nagmana sa ina

Gustong-gusto namin ang pagiging marespeto ni KC Concepcion. Hindi iyon namimili ng tao at panahon. Hindi selektibo ang pagiging marespeto ng dalaga. Ikalawang balat na talaga ni KC ang pagiging marespeto.

Kuwento ng mga kasamahan naming reporters ay hindi siya nakalilimot bumati kahit saan sila magkita. Maging sa pagsagot sa mga tanong ay maingat at marespeto ang dalaga. Tuloy ay maraming kapuwa namin manunulat ang nagsasabi na iba talaga kapag edukado ang isang personalidad.

Komento ng isang kasamahan namin, “Iba siya sa iba. May mga nasasagupa kaming artista na wala pa namang napapatunayan, pero ang aarte na at maldita! Eh, si KC, sikat na siya, anak pa ng Megastar, walang kaere-ere!”

At ilang ulit na naming napapansin na kapag hinihingan siya ng panayam ng mga TV reporters ay hindi siya tatalikod nang hindi nagpapasalamat. Parang siya pa ang nahihiya, parang siya pa ang may utang na loob na dapat tanawin, samantalang siya na nga ang nagbigay ng panahon sa mga nag-interbyu sa kaniya.

Maganda ang pagpapalaki sa kaniya ni Sharon Cuneta. Tulad ng kaniyang ina ay mapagkumbaba rin ang dalaga. Bigla tuloy naming naalala ang namayapang ama ng Megastar dahil sa paksang ito.

Noong nabubuhay pa si Mayor Pablo Cuneta ay humihingi ito ng tulong sa mga reporters para kay Sharon. Ang madalas sabihin noon ni Mayor Cuneta, “Tulungan ninyo akong mapanatiling mababa ang loob ng anak ko. Kapag may ginawa siyang palso, isumbong ninyo siya sa akin.

“Kastiguhin ninyo siya kapag nagkakamali. Pero huwag ninyo rin naman sanang kalilimutang bigyan ng komplimento ang anak ko kapag may mga nagagawa siyang maganda at tama,” hindi namin malilimutan ang mga gintong aral noon ng namayapang ama ni Sharon.

Ang pangaral na iyon ay nakayang itago ni Sharon. Sa kabila ng kaniyang estado bilang Megastar na napakarami nang napatunayan ay nananatiling mapagkumbaba ang aktres. Isang aral na tumulay at nabuhay hanggang kay KC.

Gabby Concepcion – Maraming anak na panganay pero hindi siya kinikilalang ama

Napakasuwerte naman ni Gabby Concepcion dahil may sumasalo sa kaniyang pagkaama sa kaniyang mga anak na puro panganay. Si Senator Kiko Pangilinan ang kinagisnang ama ni KC Concepcion. Si Garie naman ay itinuring nang parang tunay na anak ng namayapang kongresistang si Iggy Arroyo. At sa kaniyang mga kuwento ay kuntento na si Cloie sa kaniyang Swedish na ama-amahan dahil sa kabutihan nito sa kaniya.

Masusuwerte ring bata dahil hindi lahat ng mga anak na pinabayaan ng kanilang ama ay nakakatagpo ng pangalawang ama na magtuturing sa kanila bilang sariling dugo at laman.

Kapag napapanod namin si Senador Kiko na nagsasalita tungkol kay KC at kapag idinedepensa ng senador ang anak ni Sharon Cuneta sa anumang isyu ay naiisip lang namin, hindi kaya nasasaktan si Gabby sa ganoong situwasyon, sa halip na siya ay ibang tao ang nagtatanggol sa kaniyang anak?

At paano ba namin makakalimutan ang napakasakit na hagulgol ni Cloie nang mainterbyu namin? Labing-anim na taon silang nagkahiwalay ng kaniyang ama na ni walang namagitang “hi” at “hello” man lang sa kanila. Pero nang dumalaw dito ang dalaga kasama ng kaniyang inang si Jenny Syquia ay ni hindi man lang sila nagkita. Naglaan ba ng panahon si Gabby para magkita silang mag-ama?

Sa ganitong pagkakataon ay hindi galit ang mararamdaman mo para sa actor. Sa halip ay pagkaawa ang makakapa mo sa iyong dibdib. Dahil heto ang isang ama na pinagdadamutan ng kapalaran ng makabuluhang panahon na makasama-makayakap ang kaniyang mga anak na dugo ng kaniyang dugo at laman ng kaniyang laman.

Doon naman namin sinasaluduhan si Robin Padilla. Bumilang din ng mga relasyon ang action star na nagbunga. Pero naging responsable si Robin sa kaniyang mga anak, kahit nga yata hindi naman nito anak ay tinutulungan at minamahal pa ng sikat at mapusong action star.

Sabi nga ng matatanda, kailanman ay walang karapatang mamili ang anak ng kaniyang magiging magulang, sa totoo lang.

Charice Pempengco – May karapatang ibahin ang kaniyang itsura

Marami na ring pumapansin sa bagong anyo ngayon ni Charice Pempengco. May mga nagkakagusto sa pagpapaigsi niya ng buhok. Mayroon namang kontra. Lalong maraming tumutuligsa sa pagpapalagay niya ng tattoo sa braso.

Siguro nga ay hindi pa handa ang ating mga kababayan na tanggapin na umusad na nang pasulong hindi lang ang karera kundi pati ang edad ng magaling na singer. Hindi pa rin makalimutan ng ating mga kababayan ang batang Charice Pempengco na naging kalahok noon sa isang pambatang paligsahan sa pagkanta.

Pero napakatagal na noon. Malayo na ang narating ng dating child singer. Mas sumikat pa nga muna siya sa ibang bansa bago dito sa atin. Dahil doon ay naninibago ang mas nakararami sa kaniya. Masyado na raw siyang nagmamatapang sa pagbabagong-anyo. Parang pati raw ang kulturang kinalakihan niya ay gusto nang talikuran ni Charice.

Ang pagpapagupit niya ng maigsing buhok ay bahagi ng kaniyang pag-usad bilang performer. Ang pagpapa-tattoo niya naman ay isang uri ng sining. Gusto lang lumaya ni Charice sa kaniyang lumang itsura.

Hindi lang siguro naging maganda ang kaniyang paliwanag sa pa-slang niyang pagsasalita ng Ingles. Pero kung ginawa niya ang pangangatwiran sa wikang Pilipino ay mas maintindihan siya ng ating mga kababayan. Hindi kaiinisan na tulad ngayon.

Ikinukumpara ang kaniyang itsura ngayon kina Aiza Seguerra at Maverick, magkakamukha na raw sila, dahil dumikit ang itsura niya sa dalawang pesonalidad.

Para sa amin ay pasable lang ang ginawa ni Charice Pempengco. Ang boses niya naman ang hinangaan natin at hindi ang kaniyang itim na itim na mahabang buhok at brasong walang tattoo. Walang masama sa aming pananaw ang biglaan niyang pagbabago ng itsura.

Manny Pacquiao – Hindi naniniwalang kinulam ang nanay niya

Nagkaroon pala ng pagtatalo ang mag-inang Congressman Manny Pacquiao at Mommy Dionisia kamakailan dahil sa isyu ng kulam. Hindi kasi makayang paniwalain ng ina ang kaniyang anak na kinulam ito. Kontrang-kontra doon si Pacman, kaya nauwi ang kanilang pagtatalo sa tampuhan.

Ito ang mga panahong nakikipag-honeymoon si Congressman Manny sa kaniyang relihiyon. Nakakapanibago lang, pero talagang ganoon ang mga bagong namumulat sa isang bagong kapaniwalaan tungkol sa pananampalataya. Ang bukambibig nila palagi ay ang pangalan ng Panginoon.

At sa estado ngayon ni Pacman ay hindi siya naniniwala sa kung anu-anong kuwento. Ang Diyos lang ang kaniyang pinaniniwalaan. Hindi talaga sila magtatagpo ni Mommy Dionisia sa iisang pananaw.

Bukas ang bibig ni Pac-Mom na kinulam daw ito. Pinalaki raw ng kung sinumang iyon ang kaniyang tiyan nang dahil sa sobrang inggit sa kaniya. Apat na buwang naratay si Mommy Dionisia dahil hindi ito makalakad.

Kuwento ng aming source, “Noong una pa lang, e, ipinadadala na ni Pacman si Mommy Dionisia sa isang espesyalista, pero ayaw naman ng mama niya. Noong nagpatingin daw kasi si Mommy Dionisia sa doktor, e, wala namang nakitang palso sa kaniya, wala raw naman siyang sakit, kaya naniwala siya na kinukulam nga siya!

“Kaso, hindi naniniwala doon si Congressman Manny, kontra iyon sa faith niya ngayon, ang talagang pinaniniwalaan lang niya, e, ang Diyos, wala nang iba pa.”

Mommy Dionisia – Nakatanggap ng Hermes bag worth one million pesos

Noong regaluhan ng Hermes bag na nagkakahalaga nang isang milyong piso nina Congressman Manny at Jinkee Pacquiao si Mommy Dionisia ay maraming nakaramdam ng inggit sa nanay ni Pacman.

Sabi pa noon ng isang nagmamaasim na miron, “Tingnan mo nga naman ang buhay. Ang dating babaeng bayong lang ang bag, naka-Hermes pa ngayon kahit hindi naman bagay sa kaniya!”

Ganoon ang mga utak-talangka. Ayaw nilang nagpapaiwan. Kapag nakaaangat na ang kanilang katabi ay hihilahin nilang pilit iyon pababa para hindi sila malamangan.

Pero hindi pala malaking isyu para kay Mommy Dionisia ang makasaysayang Hermes bag na pinagpistahan ng buong bayan nang iregalo sa kaniya ng mag-asawa noong nakaraan niyang kaarawan.

Isang milyon nga ang halaga ng bag. Isang malaking kayamanan nang maituturing ng marami nating kababayan. Pero hindi pala iyon madalas gamitin ni Mommy Pacman, nasa taguan lang.

Ang dahilan, “Mahal nga ang bag na ito, isang milyon ang presyo, pero pangit naman! Iisa lang ang bulsa! Hindi ko ito madalas gamitin, piling okasyon lang, mas gusto ko pa ang ibang mumurahin kong bag!”

Ikinagugulantang din niya ang mga alahas na inereregalo sa kaniya ni Pacman. May malalaking diyamante iyon, samantalang dati ay hindi naman siya nagkakaroon ng palamuti sa katawan.

“Wala akong alahas noon dahil wala naman akong pambili. Ang lahat ng kinikita ko, kulang pang pangkain namin ng mga anak ko. Paano ako magkakaroon ng mga alahas?” pagpapakatotoo pa ni Mommy Dionisia.

Kapag kausap mo ang dakilang ina ng Pambansang Kamao ay maiisip mo na lang, hindi lahat ng materyal na bagay sa mundo ay puwedeng paghukayan ng kasiyahan. Yayakapin mo pa rin ang payak na nakaraan kung saan ka kumportable at maligaya talaga.

Sa isang panayam ay tinanong ang makapangyarihang TV host na si Oprah Winfrey, “Did fame and wealth make you happy?” Walang kagatul-gatol ang kaniyang sagot, “No. It just made me comfortable and confident.”

Jennylyn Mercado – Isinawsaw ang kamay sa timba, na-koryente daw

Lumaki na nga nang lumaki ang isyu tungkol sa naunang lumabas na balita na nakuryente si Jennylyn Mercado sa isang hotel noong mag-show siya sa Abra.

Masama ang loob ng mayor sa nasabing bayan dahil wala raw namang anumang inireklamo sa kaniya si Jennylyn hanggang noong magkita sila bago bumiyahe ang aktres papuntang Laoag kung saan siya sasakay ng eroplano pabalik sa Maynila.

Maayos daw si Jennylyn, masayang-masaya pa noong maghiwa-hiwalay sila. Kaya nagtataka ang mga taga-Penarubia, Abra kung bakit kung ano-ano nang kuwento ang lumabas noong makabalik sa Maynila ang tropa ni Jennylyn Mercado.

Kuwento ng aming source mula sa kampo ni Mayor Jing Balbuena, “Nagtataka lang kami kung bakit nakuryente ang term na ginamit nila, samantalang ang nangyari lang naman pala, e, na-ground siya noong isawsaw niya ang kamay niya sa timba na may portable water heater.

“Ang interpretation kasi sa nakuryente, e, iyong nakahawak ng livewire yung nangisay, iyong talagang nasunog ang katawan ng tao. Pero hindi naman ganoon ang nangyari, na-ground lang siya, kung totoo nga ang mga kuwento nila.

“Walang sinabi si Jennylyn kay Mayor Jing, pinuntahan pa sila ni mayor noong bago sila umalis na dala-dala ang pabaong bagnet, longganisa at bagoong sa kanila. Kaya kung talagang nagsuka-suka pala siya at nahilo, di sana, sinabi na niya iyon kay Mayor Jing?

“Bakit naman ganoon? Napakaganda naman ng ginawang pag-estima sa kanila ng mga taga-Penarubia, pero ganito pa ang pinalalabas nila? Nakakasama naman talaga iyon ng loob,” kuwento ng aming source.

Ayon naman kay Jennylyn, kahit kailan ay wala siyang sinabing anumang kuwento sa press tungkol doon. Nagulat na lang daw siya noong lumaki na nang lumaki ang balita.

Sinalo naman ng kaniyang abogadong si Attorney Joji Alonso ang responsabilidad. Ito raw ang pahapyaw na nagsabi sa isang manunulat na nakakaawa naman si Jennylyn dahil nakuryente sa Abra. Inilabas daw iyon ng reporter hanggang sa lumaki na nga ang kuwento.

Bb. Gandanghari – Nagpapalit na ba ng kasarian sa US?

Dumating na si Bb. Gandanghari sa Pilipinas mula sa New York. Matagal-tagal ding nawala sa bansa ang babaeng-babae na ngayong si Rustom Padilla. Nagpakadalubhasa raw doon sa cosmetology ang actor. At handa na niyang ibahagi ngayon sa ating mga kababayan ang mga natutuhan niya sa ibang bansa.

Maraming nagtatanungan ngayon kung ano-ano ba ang nagbago sa kaniyang pisikal na katawan? Nagpadagdag ba siya ng dibdib? Ipinabago na nga ba ni Bb. Gandanghari ang kaniyang kasarian? May basbas na ba iyon ng kaniyang pamilya na noon pa man ay tutol na tutol na sa mga ganoong hakbang?

Naalala pa namin ang madiing sinabi noon ni Mommy Eva Cariño tungkol sa paglantad ni Rustom sa mundo ng kabadingan. Ang sabi nito, “Wala na kaming magagawa pa sa kaniya, nagpakatotoo lang siya. Kesa naman sa lokohin niya ang kaniyang sarili at ang publiko, maganda na rin ang ginawa niyang pag-amin sa sexuality niya.

“Ang hiling ko lang sa kaniya, sana naman, hanggang diyan na lang ang lahat. Huwag na sana siyang magkaisip na papalitan pa ang kung anumang ibinigay sa kaniya ng Diyos,” sabi ni Mommy Eva.

Maraming nang-uusisa sa amin kung anong klase raw ba ng show ang nakatakdang gawin ni Bb. Gandanghari sa TV5? Ayon kasi sa kuwento ay ang gagawing programa ng kababalik lang na si Bb. Gandanghari ang magiging pinakauna sa mundo ng telebisyon.

Hindi kaya ang gagawin niyang programa sa TV5 ay tungkol sa pagpapaganda? Isang programang tututok sa lahat ng mga gustong malaman ng mga babae at lalaking banidosa sa katawan, dahil iyon naman ang pinagkakaabalahan niya sa Amerika?

Dra. Vicki Belo – “Enough is enough” na nga ba?

Humupa na ang pagpipista ng publiko sa hiwalayang Dra. Vicki Belo at Hayden Kho. Mukhang natapos na rin ang ilang araw na popularidad ng yoga instructor na idinidikit sa kaniyang pangalan, si Al Galang, pati ang modelong sinasabing tunay na pinagselosan ng doktor na tinanggalan ng titulo.

Ang kasunod na kuwento ngayon ay matindi raw ang ginagawang panunuyo ng binata sa doktora. Madalas palang makatanggap ng bulaklak ngayon si Dra. Vicki Belo mula sa kaniya. Parang nagsisimula na naman ang dalawa sa isang ligawan.

At sa tantiya ng mga taong mas nakakakilala sa emosyon ng doktora ay mukhang mauuwi rin sa pagbabalikan ang lahat, ramdam nila na mukhang makukuha uli ng kontrobersiyal na binata ang puso ni Dra. Belo. Hindi raw naman kasi ngayon lang nangyari ang ganito.

Iyon ang matagal nang iniisip ng mga kaibigan ni Dra. Belo. Ayaw nilang makialam sa kuwento ng pakikipaghiwalay niya kay Hayden dahil baka nga naman kapag dumating ang oras ng kanilang pagbabalikan ay sila pa mismo ang maipit sa gitna ng laban.

“Iyong sinasabi ni Dra. Vicki na enough is enough, hindi na namin pinaniniwalaan iyon! Ilang beses na ba niyang sinabi na ayaw na niya kay Hayden, pero saan ka, nagkakabalikan din naman sila.

“Kaya kapag ganyan na ang nangyayari, e, mas magandang manahimik na lang kami, para magkabalikan man sila, e, hindi na kami nasasaktan. Palagi namang ganiyan ang nangyayari sa kanila; para silang mga teenagers na away-bati!” parang nanghihinawa nang komento pa ng isang malapit sa doktora.

Have a comment on this article? Send us your feedback