Hunyo 16-30, 2022

	James Reid & Liza Soberano
	Andrea Brillantes
	Carla Abellana & Tom Rodriguez
	Moira dela Torre at Jayson Hernandez
	Nora Aunor
	Kris Aquino
	Willie Revillame
	Sharon Cuneta & Tito Sotto

Liza Soberano – Wala na sa poder ni Ogie Diaz

Lumabas ang balitang si James Reid na at ang grupo nito ang magma-manage sa career ni Liza Soberano – may magagawa bang milagro ang aktor sa karera ng dalaga?

Kahapon nagtapos ang manager-talent na samahan nina Ogie Diaz at Liza na tumagal nang 11 taon. Hindi biro ang haba ng kanilang pinagsamahan.

Natural lang namang nagaganap ang ganoon, walang samahang forever, pero ang pinakamagandang pangyayari ay naghiwalay sina Ogie at Liza na magkaibigan pa rin.

Iyon ang gusto ni Ogie, iyong hindi sila magsusunog ng tulay, wala nga namang kasiguruhan ang bukas. Pero alam namin, may bahid ng lungkot ang pangyayaring ito kay Ogie.

Itinuring na niyang karagdagang miyembro ng kaniyang pamilya si Liza, saka wala tayong nabalitaang anumang hindi nila pagkakaunawaan; hihilutin pa ni Ogie nang matagal na panahon ang kaniyang puso bago siya makasulong sa paghihiwalay nila ng kaniyang alaga.

Nagkatulungan silang dalawa. Dumating si Liza bilang alaga ni Ogie noong mga panahong matindi ang gamutang pinagdadaanan ng kaniyang bunsong si Meerah.

Milyones ang ginastos niya sa kaniyang anak na halos sa ospital na muna tumira bago sa kanilang bahay. Kapag pumipirma siya bilang manager sa bawat product endorsement ni Liza ay lagi siyang nagpapasalamat sa Diyos dahil mayroon na naman siyang pambayad sa maraming doktor ni Bunso.

Si Meerah na ipinanganak na kasyang-kasya lang ang kaliitan sa isang palad dahil sa kakapusan sa buwan ay nakaalpas, naligtasan ng kanilang pamilya ang mga pagsubok, sumikat naman si Liza Soberano.

Palaging ganoon. Dumarating sa ating buhay ang taong makakakambal natin sa problema, tamang-tama ang pagdating ni Liza sa buhay ni Ogie, ganoon din ang pagmamaneho ni Ogie sa kaniyang career na napakaganda ng naging resulta.

James Reid – Bagong manager ni Liza Soberano

Ngayon ay si James Reid na ang magpapatakbo sa career ni Liza Soberano. Gustong subukin ng dalaga ang mundo ng Hollywood. Kung ganda ang pag-uusapan ay pasadung-pasado ang dalagang aktres.

Pero ang tanong, mayroon ba namang kapasidad si James Reid na tuparin ang pangarap ni Liza, may napatunayan na ba ang aktor na nabigo nga ang takbo ng karera dito sa atin?

Iyon ang malaking tandang-pananong ng marami, paano pagtatagumpayin ni James ang career ni Liza sa Hollywood, samantalang wala pa nga itong napatutunayan?

Palagi silang magkasama ngayon sa Amerika habang nasa Spain pa si Enrique Gil. Nag-iimbita ng pagdududa ang kanilang sitwasyon ngayon.

Hindi raw kaya matagal nang tapos ang relasyon nina Liza at Quen pero hindi lang muna sila nagsasalita? Mauwi raw kaya sa relasyon ang palaging pagsasama ngayon nina Liza at James?

Maraming puwedeng mangyari. Hindi imposibleng magkahulugan ng kalooban ang dalawa kung tapos na ang relasyon ng LizQuen.

Matagal nang hiwalay sina James at Nadine Lustre, may bago nang karelasyong banyaga ang aktres, ayon kay James ay wala muna itong panahon para sa pakikipagrelasyon dahil sa dami ng kaniyang mga pangarap.

Tanong ng kaibigan naming propesor, “Hindi kaya planado ang lahat ng ito? Parang premeditated kasi. Iyon lang ang naiisip ko dahil dati, kung nasaan si Liza, nandoon din si Enrique!

“Why all of a sudden, e, ganito na? Let’s wait and see, pero iba ang naglalaro sa isip ko ngayon. Sorry, pero hindi na ako magugulat kapag lumabas ang kuwentong James and Liza are together na,” reaksiyon ng aming kaibigan.

Iyon ang kailangan nating antabayanan.

Andrea Brillantes – Sinasadya na ang sobrang kaartehan

Gigil na gigil na kay Andrea Brillantes ang mga kababayan natin. Hindi sa kaniya mismo, kundi sa kaniyang kaartehan, na duda ng mas nakararami ay sinasadya na niya.

Pagkatapos niyang mag-baby talk sa isang resort ay nakita naman siyang nakasakay sa cart na itinutulak ng kaniyang boyfriend na si Ricci Rivero sa isang malaking pamilihan.

Hindi na bago ang ganoon sa atin, isinasakay naman talaga ng mga magulang ang kanilang mga anak sa cart habang nag-iikot sila sa pamimili, pero iyong si Andrea ang nakasakay sa cart?

Sangkatutak na komento ang inani doon ni Andrea, sabi ng isa, “Para siyang lukring! Ano ang akala niya sa sarili niya, bata, para sumakay sa cart? Damulag na siya! Matanda na siya! Super-OA talaga ang babaeng ito!”

Pakiramdam naman ng iba ay parang wala nang ginagawa sa maghapon sina Ricci at Andrea kundi ang magpakasaya. Parang hindi na raw naaasikaso ng basketbolista ang kaniyang pag-eensayo.

At mukhang wala ring pinagkakaabalahang trabaho si Andrea, napakaluwag ng kaniyang oras, kaya palagi silang magkasama ng kaniyang boyfriend.

Malakas ang loob ng isang basher ng dalaga, ang sabi nito, “One day, break na ang dalawang ‘yan! Nagkasawaan na sila! Para na kasi silang kambal na hindi na naghihiwalay!”

Pinagtatawanan na lang ng marami ang mga ipinakikitang kaartehan ni Andrea, parang ngayon lang daw kasi nakawala sa kural ang babaeng ito, kaya ganyan siya.

Carla Abellana at Tom Rodriguez – Patuloy ang pananahimik

Sa halip na magkaroon ng tulay sa kanilang paghihiwalay ay mukhang matibay na pader pa ang namamagitan ngayon kina Tom Rodriguez at Carla Abellana.

Patuloy na lumalala ang mga kuwento, padagdag nang padagdag, hindi nababawasan. At sa paglutang ng mga istorya tungkol sa kanilang hiwalayan ay pareho silang naaapektuhan.

Okey lang ang pananahimik, karapatan nilang magkaroon ng kapribaduhan, pero may mga pagkakataong kailangan nilang magsalita para sa ikalilinaw ng naganap sa kanilang buhay.

Ang dami-dami nang naglitawang kuwento, pinagsuspetsahan na ang pagkalalaki ni Tom, pinagbintangan na ring nagdispalko nang milyones na ipon nila ni Carla ang aktor.

Pero wala pa ring naririnig mula kina Tom at Carla, pinababayaan lang nilang maging laman ng kontrobersiya, walang nagbibigay sa kanila ng paliwanag kung bakit sila naghiwalay pagkatapos lang nang tatlong buwan nang sila’y ikasal.

Nitong huli ay nagbigay ng pahimakas si Tom, nag-post siya ng larawan ng isang posas na putol na ang gitna, kalayaan ang interpretasyon ng mas nakararami sa kaniyang post.

Malaya na raw si Tom mula sa relasyon nila ni Carla, sabay bura sa lahat ng mga retratong natira sa kaniyang account, iyon na nga ba ang paramdam ni Tom na hindi na sila magkakabalikan pa ni Carla?

Isang source ang nagbulong sa amin, “Akala kasi ni Tom, sa haba ng panahong naging magkarelasyon sila ni Carla hanggang sa magpakasal na sila, e, kilalang-kilala na niya iyong girl!

“Pero hindi pa pala. Di bale, lalabas din naman ang katotohanan in time, malalaman din natin kung ano talaga ang nangyari. Nakakaawa lang si Tom. Siya ang nadidiin,” malungkot na sabi ng aming kausap.

Moira dela Torre at Jayson Hernandez – Nauwi rin sa wala ang pagsasama

Naging magkaibigan sila nang pitong taon. Nagsama sila bilang mag-asawa nang tatlong taon. Pero sa hiwalayan din nauwi ang relasyon nina Jason Hernandez at Moira dela Torre.

Isang malinaw na senyal ang hatid ng kanilang hiwalayan. Hindi ngayon at pareho silang musikero na nagkakasundo sa tono at liriko ng kanilang mga komposisyon ay ganoon din ang mismong magaganap sa kanilang relasyon.

Si Jason Hernandez ang nagpahayag ng dahilan kung bakit ginusto nitong maghiwalay na sila ni Moira. Ang kaniyang pagtataksil ang madiin nitong rason, sa kanilang pagsasama bilang mag-asawa ay naging taksil si Jason, gusto nitong ituwid ang kaganapan.

Napakasakit para kay Moira ang pangyayaring ito. Panay-panay pa naman ang kaniyang pagdedenay noong unang lumabas ang balita na fake news ang paghihiwalay nila ni Jason.

Tinanggal noon ni Moira ang mga retrato nila ni Jason, wala siyang iniwanan sa kaniyang account, pero itinanggi niyang hiwalay na sila.

Sayang ang kanilang kumbinasyon dahil pinagbuklod sila ng musika. Iyon ang naging buhay nila. Magaganda ang kanilang mga komposisyon na binibigyan ng hustisya ni Moira bilang singer.

Pero sa wala rin nauwi ang kanilang pagsasama. Ang pagiging mapusok ni Jason ang naging dahilan. At hindi lang pala minsang naganap iyon kundi paulit-ulit.

Naging totoo si Jason, hindi nito ipinagkaila ang kaniyang nagawang kasalanan, iyon ang ibinubutas laban sa kaniya ngayon ng mga tagasuporta ni Moira.

Ang mga Marites namang pilosopo ay iba ang ibinibigay na interpretasyon sa hiwalayan, naumay na raw siguro si Jason sa pakikisama ni Moira, noon pa napapabalitang may sariling mundo ang magaling na singer.

Binalikan namin ang mga nakaraang panayam kay Moira. Sinuyod din namin ang mga ginawa nilang music video ni Jason mula noong mag-boyfriend pa lang sila hanggang sa naging mag-asawa na.

Tinilad namin ang mga kuwento na si Moira mismo ang pinagmulan. Apat na taon siya nang magkahiwalay ang kaniyang mga magulang. Dalaga na siya nang magkita uli sila ng kaniyang ama.

Batambata pa ay matinding kalungkutan na ang palaging kakambal ni Moira. Nang magdalaga siya ay kinailangan na niyang magpa-therapy dahil matindi na ang kaniyang depresyon. Kung anu-ano na ang naiisip niya kasama na ang suicide.

Magaganda ang piyesa ni Moira, bukod pa sa may sariling bersiyon siya ng pagkanta na kinagat ng publiko, dahil tunay namang nanghahalina.

Ngayon lang namin naisip na kaya pala palaging may salitang wakas sa kaniyang mga kanta ay dahil iyon ang kaniyang nararamdaman. Nababalot siya ng depresyon.

Malalim ang hiwalayan nila ni Jason, hindi iyon kasing simple ng pag-amin ng lalaki na naging marupok ito sa kanilang relasyon, siguradong mas marami pa silang kailangang ayusing problema para makaasa tayo sa kanilang pagbabalikan.

Pagkatapos naming panoorin ang mga nakaraang panayam ni Moira dela Torre ay nakaramdam kami ng awa sa magaling na singer. Maraming emosyong nakatago sa kaniyang puso.

Sana’y itapon na niyang lahat iyon para maging maaliwalas ang kaniyang buhay. At para hindi na niya hinahanap ang kaligayahan.

Nora Aunor – Isa nang National Artist

Masayang-masaya ang mga loyalista ng Superstar sa pagtatanghal sa kaniya bilang National Artist. Wala na nga namang mas tataas pang karangalan kesa sa tinanggap ng Superstar.

Ang mga kababayan naman natin ay masaya, hindi man nila idolo si Nora Aunor, dahil kakambal ng parangal bilang National Artist ang kasiguruhan ng kaniyang kinabukasan.

Bukod sa buwanang Php 30,000 na ibinibigay sa mga pinararangalan ay may malaking tulong din ang NCCA sa panahon ng kanilang pagkakasakit.

Napakaaga pang pag-usapan pero hanggang sa kanilang pagpanaw ay nakahanda na ang mga benepisyo para sa kanila. Sa Libingan Ng Mga Bayani sila ihihimlay. Napakalaking suporta nga naman noon.

Wala pa lang nakahandang proyekto para kay Nora pero kayang-kaya pa rin naman niyang umarte. Walang nagbabago sa kaniyang pagganap, boses lang niya ang naapektuhan, kaya ang kaniyang unang pangarap bilang mang-aawit ay hindi na niya nagagawa.

Hinog na hinog na ang pagkakataon para parangalang National Artist si Nora Aunor. Sa talentong ipinakita niya sa pagganap at pagkanta ay hindi na dapat kuwestyunin ang pinakamataas na antas ng award na ibinigay sa kaniya.

Wala nang mahihiling pa ngayon ang mga Noranians na napakatagal na panahon nang umaasang tanghaling National Artist ang kanilang idolo.

At nawa’y maging dagdag na inspirasyon para sa Superstar ang parangal na ito. Laban lang nang laban! Walang sukuan!

Ilang dekada niyang pinaghirapan ang parangal na karapat-dapat lang naman ihandog sa isang Pilipinong anak ng sining na nagmahal sa kaniyang trabaho sa mundo ng pelikula.

***

Nagrerebelde ang kalooban ng mga tagasuporta ng Star For All Seasons sa pagkahirang sa Superstar bilang National Artist sa sining ng pelikula.

Madaling intindihin ang kanilang emosyon, ganoon naman talaga ang damdamin ng mga tagahanga, ang kanilang idolo ang pinakamagaling sa anumang larangan.

Palagi na lang daw ninanakawan ng parangal si Congresswoman Vilma Santos dahil wala siyang kapit. Pero kung mga katangian ng isang Pambansang Alagad Ng Sining sa mundo ng pelikula ang magiging barometro, para sa mga Vilmanians, ay ang kanilang idolo ang pinakakarapat-dapat.

Lumipad ang kanilang pag-asa na mas unang tatanghaling National Artist ang Star For All Sasons dahil kung imahe nga naman ang pag-uusapan ay walang kuwestiyon sa kanilang idolo sa anumang aspeto.

Sinasaluduhan namin si Congresswoman Vilma sa pagpapakalma sa kaniyang mga tagasuporta. Maagap ang aktres-politiko, siya ang nagbigay ng pahayag na siguradong magpapatahimik sa emosyon ng kaniyang mga tagahanga, ganoon dapat ang ginagawa ng sinumang personalidad.

Naniniwala siya na anumang bagay o karangalan, kapag nakatakdang mapasakamay niya, ay siguradong mangyayari. At hindi naman kasali ang kaniyang pangalan sa mga pinamilian ng NCCA sa pagkakataong ito.

Mas masakit kung sabay na ipinasok ang pangalan nila ni Nora Aunor, pero ang Superstar ang ginawaran ng pinakamataas na antas ng parangal, talagang matindi ang sama ng loob na mararamdaman ng mga Vilmanians kung ganoon ang naganap.

Pana-panahon lang. Hindi pa katapusan ng mundo. Siguradong may nakaabang na makapagpapasaya sa mga Vilmanians dahil totoo namang karapat-dapat parangalan ang Star For All Seasons sa ipinamalas niyang talento sa pagganap.

Kris Aquino – “One in a million” ang dumapong sakit

Pagkatapos nang mahaba-habang panahon ay muling naglabas ng mga detalye si Kris Aquino tungkol sa kaniyang sakit. Pero mas maganda ang kaniyang ginawa, isang espesyalista mula sa Houston ang kaniyang hiningan ng tulong para magpaliwanag tungkol sa kaniyang pinagdadaanan, mas malinaw ang mga detalye.

Tama ang matagal nang sinasabi ng mga doktor na nakakausap namin, one in a million nga o very rare ang dumapong sakit ni Kris, kailangan nang masusing gamutan.

Maraming bawal na gamot kay Kris, mayroon siyang kailangang inumin pero hindi pa lisensiyadong mabili dito (sa Pilipinas) at sa Singapore, sa Amerika pa lang mayroon.

Aminado si Kris na panahon ang kaniyang kalaban ngayon. Kailangan niyang kumilos nang doble kundi man triple para maisalba pa ang iba niyang internal organs lalo na ang kaniyang puso.

Sa paliwanag ng espeyalista sa kaniyang sakit ay hindi madalian ang prosesong pagdadaanan ng TV host, tutukan iyon at matagalan, hindi ordinaryong problemang pisikal ang kakambal niya ngayon.

Totoong nakakaawa si Kris sa kaniyang kundisyon, pero salamat pa rin, dahil armado siya ng pangtustos sa kaniyang gamutan. Oo nga’t isang tao lang sa isang milyon ang kinakapitan ng kaniyang sakit ay mayroon naman siyang milyones na pangtapat sa kaniyang problema.

Kung walang milyones ang pasyente ay siguradong takdang panahon na lang ang hihintayin pero dahil may huhugutin si Kris sa kaniyang punumpunong bulsa ay malaki pa ang pag-asang maligtasan niya ang matinding hamon na ito.

Nagpapasalamat siya sa mga nagdarasal para sa kaniyang kaligtasan. Napakahalaga ng panalangin para sa kaniyang kalagayan ngayon dahil ang mga doktor ay kasangkapan lamang ng tunay na nakakaalam kung ano ang magaganap sa ating buhay.

Harinawang maging matagumpay ang kaniyang gamutan. At sana nga ay hindi pa panahon ang kaniyang kalaban. Mahabang oras pa sana ang nakalaan para kay Kris Aquino hanggang sa siya’y tuluyan nang gumaling.

Willie Revillame – Biktima ng fake news

Naging biktima na naman ng fake news si Willie Revillame. Iyon ang nakikita naming hindi maganda kapag hindi palasalita ang artista.

Kapag tahimik lang ang personalidad ay napakadali niyang biktimahin, hindi kasi siya palasagot sa bashing, tahimik ang kaniyang buhay.

Matagal nang iniimbita ni Pangulong Rodrigo Duterte at ni Senador Bong Go na kumandidato bilang senador ang TV host. Talagang masugid ang pakiusap ni PRRD kay Willie, pero hindi nila nakuha ang pagsang-ayon ng TV host, nagbigay siya ng pahayag.

Buong bayan ang nakarinig-nakapanood sa sinabi ni Willie na walang problema sa pagtakbo. Pero inaalala niya ay ang mga kasunod na senaryo.

Kung sakaling suwertihin siyang manalo ay ano ang gagawin niya sa Senado? Wala siyang alam sa pagbabalangkas ng batas, masasayang lang ang boto sa kaniya ng mga kababayan natin, kaya siya na mismo ang marespetong tumanggi sa pagpasok sa mundo ng pulitika.

Iyong mga salitang iyon ni Willie ay dinoktor. Pinalabas ng vlogger na ang mga ipinahayag niya ay patungkol kay Robin Padilla. Isang maliwanag na fake news ang laman ng vlog.

Noong nakaraang taon pa niya binitiwan ang pahayag, pero pinalabas na pagkatapos na ng eleksiyon niya sinabi iyon, bilang parinig kay Robin Padilla na nakakopo sa unang puwesto bilang senador.

Nakakagulat ang ibang vloggers. Kinakaya nilang maglabas ng mga pekeng kuwento. Pati nga retrato ay ibinabagay nila sa laman ng kanilang content.

Pinagharap pa ang mga larawan nina Willie at Robin, itinuturo ng TV host ang action star na nakayuko, di ba naman isang napakalaking fake news noon?

Kaya kung minsan ay kailangan ding nagsasalita ang mga artistang nabibiktima ng fake news. Hindi na uso ngayon ang basta pananahimik dahil nawiwili ang mga taong nakalulusot ang mga ginagawang kalokohan para lang sila kumita.

Tahimik lang kasi si Willie. Hindi siya nakikisawsaw sa kahit anong isyu, itinututok niya ang mahalagang panahon para sa pagpapaunlad ng kaniyang kabuhayan, wala siyang pakialam sa mga bashers at trolls.

Kung mapagpatol si Robin Padilla ay siguradong magbibigay ito ng reaksiyon sa lumabas na fake news. Pero halatado naman kasing dinoktor lang ang video, pati ang mga pahayag ni Willie, sayang lang ang kaniyang panahon para pumatol.

Sharon Cuneta at pamilya Sotto – Nagkasundo na

Napakalaking tinik ang nabunot sa lalamunan ni Sharon Cuneta nang maganap ang pagkikita-pagkakaunawaan nila ng pamilya Sotto. Nagkaroon na ng kapayapaan ang kaniyang kalooban.

Sa kabila ng sakit na naramdaman ng pamilya nina Senate President Tito Sotto at Tita Helen Gamboa ay natagpuan agad nila ang pagpapatawad sa kanilang puso.

Ang magkakapatid na Lala, Apple at Ciara ang gumawa ng paraan para matuldukan na ang hindi nila pagkakaunawaan ng Megastar. Panganay na kapatid kung ituring nila ang Megastar.

Ayaw pa ring tantanan ng mga bashers ang singer-actress, tanong sa kaniya ng mga ito, “Bakit ikaw lang ang humingi ng tawad sa mga Sotto? Nasaan ang ambisyoso mong asawa na pinakaugat ng away n’yo?”

Natural, ang nakikita lang ng mga kontra kina Sharon at Senador Kiko Pangilinan ay ang ginawang pakikipagsalpukan nito kay SP Tito noong nakaraang halalan, pero pareho silang hindi nagtagumpay.

Ngayon ay malinaw na malinaw na kay Sharon na ang pamilya ay pamilya. Mas matimbang ang dugo kesa sa tubig. Ang pamilya Sotto na lang ang tinatakbuhan niya kapag mayroon siyang problema.

Palaging nakahanda ang magkabilang tenga ng pamilya Sotto sa mga pagkakataong halos wala na siyang kakampi sa mundo. Nakikihalakhak sa kaniyang tagumpay at nakikiiyak sa kaniyang mga kabiguan. – CSF