Abril 1-15, 2022

	Kit Thompson & Ana Jalandoni
	Sarah Geronimo & Matteo Guidicelli
	Willie Revillame
	Erich Gonzales
	Bea Alonzo & Alden Richards
	Yen Santos & Paolo Contis
	Troy Monero & Aubrey Miles
	Angelica Panganiba & Gregg Homan
	Sharon Cuneta
	Kris Aquino
	Carla Abellana
	Ariel Rivera
	Manny Pacquiao

Ana Jalandoni – Bugbog sarado kay Kit Thompson

Nakakalungkot ang nangyari kina Kit Thompson at Ana Jalandoni. Pinagpistahan ng buong bayan ang naganap na pananakit ng aktor sa kaniyang girlfriend.

Anuman ang naging ugat ng pananakit, sabihin mang si Ana ang nagpasimula ng gulo, ay si Kit pa rin ang walang kaduda-dudang huhusgahan ng publiko sa naganap.

Ano ba naman ang laban ng isang babae kumpara sa lakas ng isang lalaki? Brusko pa naman ang dating ni Kit, malalaki ang kaniyang kamao, kaya parang boksingerong napadapa na lang sa lona ang babae.

Matatagalan pa bago makalimutan ng marami ang kaganapang ito. Hindi maganda ang resulta ng pananakit ni Kit. Mahabang panahon siyang huhusgahan ng mga kababayan natin.

Sino ba naman ang hindi maaawa sa isang babaeng sumarado ang mata nang dahil sa lakas ng suntok na tinanggap nito?

Dalawang bagay ang maaaring maganap. Ang patawarin ni Ana si Kit dahil iyon ang dikta ng kaniyang puso. Ang ituloy ang kaso dahil iyon ang nararapat sa nangyari sa kaniya para mabigyan ito ng hustisya.

Kasabihan nang duwag ang lalaking gumagamit ng lakas sa isang babae. Ang lalaking matapang ay humahanap ng kaniyang kasukat. Ang babae ay nirerespeto at hindi sinasaktan dahil larawan siya ng ating ina.

Nakalimutan iyon ni Kit Thompson. Hindi siya singaw lang na biglang iniluwa sa mundo. Mayroon siyang ina. At si Ana Jalandoni ay isang babaeng kawangis ng kaniyang nanay.

Sarah Geronimo – Napakasuwerte sa asawang si Matteo

Kung may katotohanan ang kuwento na lumalambot na ang puso ng mga magulang ni Sarah Geronimo para sa kanila ni Matteo Guidicelli ay napakagandang balita nito na siguradong mas ikaliligaya ng mga tagahanga ng mag-asawa.

Iba ngang gumamot ang panahon. Kailangan lang talagang maghintay, nakaiinip kung minsan, pero sa magandang istorya rin nagtatapos ang mga hindi pagkakaunawaan.

Walang dapat ipag-alala sina Daddy Delfin at Mommy Divine sa kanilang manugang, mahal na mahal at iniingatan ni Matteo ang kanilang anak, napakasuwerte ni Sarah sa aktor.

Sabi ng isang kaibigan naming kakilala rin ang mga magulang ni Sarah ay hindi na gaanong emosyonal si Mommy Divine.

“Kumpara noon, e, parang tanggap na ni Mommy Divine ang pag-aasawa ni Sarah. Na dapat lang naman, sinasabi namin sa kaniya, dahil nasa wastong age na ang anak niya.

“Iyong pagtatago lang siguro ng kasal ang masyado nilang dinamdam ni Daddy Delfin, pero kung ipinaalam naman iyon sa kanila, e, hindi rin naman sila papayag, di ba?

“Pero napapansin namin na mas okey na si Mommy Divine ngayon, nakakatawa na nga siya nang malakas, unlike noon na parang pasan niya ang daigdig kapag nakikita namin siya. Sa kanila kami pumapakyaw ng mga gulay, malawak ang pataniman nila,” sabi ng aming kakuwentuhan.

Harinawang magkatagpo na nga sina Sarah at Matteo at ang mga magulang na sobrang nasaktan nang mag-asawa ang kanilang anak.

Willie Revillame – Malaki ang utang na loob sa GMA7

Nasa gitna pa rin ng laban si Willie Revillame. Lahat ng kilos niya ay binabantayan, lahat ng ginagawa niya ay tinututukan, napaka-relevant pa rin ng TV host.

Ngayon pa lang siya naghahabol sa panahong hindi niya nakakasama ang kaniyang mga anak at apo, ngayon pa lang sana niya mareregaluhan ng pahinga ang kaniyang katawan, pero inip na inip na ang mga tagasuporta niya sa kaniyang pagbabalik-telebisyon.

Hindi natiis ni Willie ang kaniyang mga tagahanga, ang mga kababayan nating itinuturing na siyang hulog ng langit, kaya mayroon pa rin siyang programang napapanood sa FB at You Tube sa pamamahagi niya ng ayuda.

Dahil medyo may kaluwagan ang kaniyang oras mula noong hindi na siya pumirma ng kontrata sa GMA-7 ay nagkaroon siya ng panahong makapagpa-executive check-up.

Hindi niya iyon nagagawa noong aktibo pa siya sa Wowowin, okupado ang kaniyang oras, ngayon lang niya natutukan ang kaniyang kalusugan.

Dalawang polyps ang nasilip sa kaniyang bituka, kahit wala naman siyang nararamdaman ay pinayuhan siya ng kaniyang mga doktor na kailangang tanggalin ang bukol sa kaniyang bituka, magpapaopera si Willie kung talagang kinakailangan.

“Wala, kahit anong sign, wala akong nararamdaman, pero mayroon pala akong polyps. Ito iyong napapabayaan madalas ng mga tulad kong busy sa trabaho. Walang time palagi, walang bakanteng panahon, pero dapat, mayroon,” sabi pa ng TV host.

Noong Lunes ay nagkita sila ni dating Senador Manny Villar at ng anak nitong si Paolo, marami silang pinagmitingan, pagkatapos kasi ng Mahal Na Araw ay marami na silang kailangang trabahuhin sa pagbubukas ng bago nilang network.

Maraming masaya sa kanilang mga plano para sa AMBS, lalo na ang mga kaindustriyang nawalan ng trabaho, umaasa ang mga ito na panibagong pag-asa ang hatid sa kanila ng network ng mga Villar.

Itinatawa na lang ni Willie ang kuwentong gusto na raw uli niyang bumalik sa GMA-7, nagsisisi na raw siya sa naging desisyon niyang bumitiw sa network, salat na salat iyon sa katotohanan.

Madalas niyang kabalitaan ang mga ehekutibo ng istasyon, pati ang mga naging katrabaho niya sa network, pero walang usapin tungkol sa kaniyang pagbabalik.

“Napakalaki ng utang na loob ko sa GMA-7, bibitbitin ko ang pasasalamat na iyon habambuhay,” sabi pa ni Willie Revillame.

Erich Gonzales at Mateo Lorenzo – Nagpakasal na

Napakaraming napapa-”Sana all” sa napakagandag regalo ng kapalaran kay Erich Gonzales. Hindi naman salapi ang simula at wakas ng buhay pero nang magsabog ng biyaya ang langit ay mukhang bukas pati ang bubong ng bahay niya para masalo ang lahat-lahat.

Katatapos lang ng kasal nina Mateo Lorenzo at Erich Gonzales sa isang simpleng pagharap sa altar. Ayon sa aming impormante ay parang pampamilya at malalapit na kaibigan at kanegosyo lang ang ginanap na kasal.

Sinabi rin nito na ang reception ay ginanap sa mismong tahanan ng mga Lorenzo sa Ayala-Alabang. Napakasimple, komento pa ng aming source, natapos ang kasalan na walang masyadong ingay.

Bilyonaryo ang napangasawa ni Erich Gonzales, matagal na ang kanilang relasyon, pero hindi iyon ipinagmakaingay ng aktres. Binigyan niya ng kapribaduhan ang kanilang pagmamahalan.

Anak si Mateo Lorenzo ng mag-asawang negosyante ng mga food chains, sila rin ang nakabili ng Hacienda Luisita ng mga Cojuangco, kung isa-isahin ang mga negosyo ng pamilya ng napangasawa ni Erich ay baka kapusin ang espasyong ito.

Maraming maligaya para ka Erich, pero mas marami ang sumisigaw ng “Sana All!” sa napakaganda niyang kapalaran, sigurado na ang kinabukasan ngayon ng magandang aktres.

Alden Richards at Bea Alonzo – Bibida sa bagong serye ng GMA7

Buhay na buhay na naman ang mga loyalista ni Alden Richards. Mayroon na naman kasi silang aabangang seryeng pagbibidahan ng kanilang idolo katambal si Bea Alonzo.

Matagal-tagal na ring wala silang pinagpupuyatang proyekto ng Pambansang Bae sa telebisyon, inip na sila, mabuti naman at magsisimula nang humarap sa mga camera ng Start-Up si Alden.

Sa kasalukuyang panahon ay si Alden talaga ang pinakasikat sa kaniyang hanay. Napakasuwerteng personalidad, nakadalawang taong mahigit na ang pandemya, pero ni hindi niya naramdaman ang paghihirap sa paghanap ng trabaho ng kaniyan mga kapuwa artista.

Napakaguwapo ni Alden, isang napakagandang aktres naman ang kaniyang katambal sa serye, nakakasabik nga namang mapanood na ang kanilang proyekto.

Akala ng marami ay si John Lloyd Cruz ang makakatambal ni Bea sa paglipat nito sa GMA-7, pero naisip siguro ng mga ehekutibo na mayroon naman silang aktor na sigurado nang magtatagumpay, kaya bakit pa nga naman sila susugal sa iba?

Pelikula na ang kasunod ng gagawing serye nina Alden at Bea, ang Special Memory, ngayon pa lang ay nangangamoy malaking tagumpay na agad ang kanilang tambalan.

Paolo Contis at Yen Santos – Di pa man umaamin, break na?

Nang pumutok ang balitang hiwalay na sina Paolo Contis at Yen Santos ay isa lang ang naging komento ng publiko—hindi pa nga sila umaamin, break na agad?

Wala pa nga namang umaamin sinuman kina Paolo at Yen tungkol sa kanilang relasyon. Nakikita silang magkasamang kumakain, namamasyal at nagsisimba pero walang direktang pag-amin na nagmumula sa kanila.

Magkaibigan lang daw sila, nagpunta lang sila sa Baguio City bilang friends, na pinagtaasan lang ng kilay ng ating mga kababayan.

Pero fake news pala ang lumabas na kuwento dahil kailan lang ay may mga Marites na namang nakakita kina Paolo at Yen na magka-holding hands pang namamasyal sa isang sosyaling mall.

Wala raw katotohanan ang napapabalita na hindi na sila nagkikita, parang mongha na nga raw ngayon si Yen na nasa bahay lang at ang tanging libangan ay ang pagbabasa ng libro, patuloy pa rin daw ang pagkikita ng dalawa.

Friends lang daw sila, magkaibigan lang talaga, kaya ang sagot ng mga Marites na nasusundan ang kanilang mga galawan ay isigaw na lang nila iyon sa hangin.

Troy Montero at Aubrey Miles – Magpapakasal na

Salamat naman at pagkatapos nang 18 taon ay magpapakasal na sina Troy Montero at Aubrey Miles. May dalawa na silang anak, itinuturing na ring anak ni Troy ang anak ni Aubrey sa una niyang karelasyon, maayos ang kanilang pagsasama.

Naaalala pa namin, dalawang dekada na ang nakararaan nang ilantad namin na mayroon nang anak si Aubrey kay JP Obligacion, ginawa kaming sinungaling ng aktres sa matigas niyang pagdedenay na walang katotohanan iyon.

Maglalabas daw kami ng edidensiya, gawa-gawa lang daw namin ang kuwento, mabuti na lang at nakunan namin ng retrato ang bata habang nagsu-swimming sa tinitirhan niyang townhouse.

Anim na taon pagkatapos ay napanood namin si Aubrey na humahagulgol sa isang talk show. Magkahalo ang luha at sipon ay inamin niya na mayroon na raw siyang anak, walong taon na noong panahong iyon ang batang lalaki, bendikasyon para sa amin ang kaniyang pagtatapat.

Nagpainterbyu siya sa amin sa aming programa sa TV5, ang Paparazzi, nang magkaharap kami ay yumakap siya nang mahigpit kasabay ang panghihingi ng sorry.

Natagalan lang ang kaniyang pag-amin pero ang mahalaga ay ang pagtanggap niya sa katotohanan na siya ang kinulang at hindi kami.

Sa Amerika pa namin natalisod ang pagkakaroon ng anak ni Aubrey Miles. Kumakain kami sa isang restaurant nang may lumapit na nurses sa amin.

Kilala raw ba namin si Aubrey Miles? Kapapanganak lang daw kasi, lalaki ang kaniyang anak, doon mismo sa ospital na pinagtatrabahuhan nila.

Napakaliit ng mundo. Gagawa at gagawa ng paraan ang kapalaran para ilantad ang anumang itinatago. Tulad ng anak ni Aubrey Miles.

Angelica Panganiban – Nagdadalantao na

Tanong ng mga kaibigan naming Marites, ano raw kaya ang ginawa ni Angelica Panganiban noong mga panahong nakikipagrelasyon siya nang hindi nagdadalantao?

Huwag daw namang sabihing nakipaglaro lang ng jackstone si Angge nang maging magkarelasyon sila ni Derek Ramsay, ni John Lloyd Cruz, ni Carlo Aquino at ng iba pang nailihim sa publiko?

Pills daw siguro ang dahilan para maiwasan ni Angelica ang pagdadalantao. Mayroon ding nagsabing may injection na para hindi magbunga ang paglipad sa alapaap ng kaligayahan ng magkarelasyon.

Kay Gregg Homan lang nagdalantao si Angge, na kung tutuusin ay hindi pa naman niya katagalang nagiging boyfriend, kumpara kay Derek na umabot sila nang mahigit na anim na taon.

Ngayon pa nga lang siguro nakahanda si Angelica para sa pagdadalantao. Na tama lang naman dahil hindi na siya bumabata. At siguro rin ay nakasisiguro na siya kay Gregg Homan.

A baby is always a blessing. Kaya naman walang kasingligaya si Angelica Panganiban ngayong dinadala na niya ang magiging produkto ng pagmamahalan nila ni Gregg Homan.

Napakagandang biyaya.

Sharon Cuneta – Maraming tagahanga ang bumaklas na

Naging napakasakit para kay Sharon Cuneta ang naging resulta ng pinakahuling isyung kinasangkutan niya. Hindi siguro niya inasahan na ang komento niya tungkol sa pagkanta ni Attorney Sal Panelo sa pinasikat niyang piyesa ay mag-imbita pala ng galit mula sa husgado ng bayan.

Suyurin man natin ang You Tube ay siya ang laman. Basta may kinalaman sa showbiz, idagdag pa ang mga vlogs na pampulitika, ay talagang si Sharon ang dinidikdik.

May isang vlogger pang nakabase sa Amerika ang panay-panay ang pagtawag sa kaniya na laos na, isa na raw siyang bituing walang ningning, kung iisa-isahin ng Megastar ang laman ng mga vlogs ngayon ay baka naisin na lang niyang magpunta sa ibang planeta.

Pero ang pinakamatindi ay ang mga nagpapakilalang dati niyang tagahanga na dahil sa isyung ito ay bumaklas na. Ano raw ba ang nangyayari kay Sharon at lahat ng lang ay ikinaaalarma niya?

Mayroon mang nagdedepensa sa kaniya ay konting-konti lang iyon kumpara sa mga nilalaman ng mga vlogs na siya talaga ang dindapurak.

Ang ma vloggers na maka-BBM, grabe ang patutsada kay Sharon, talagang inupakan siya nang husto, iyong halos hindi na siya makabangon.

Iyon ang sinasabi naming nakapanghihinayang. Nang dahil lang sa isyu ay parang nabura na ang lahat-lahat ng magagandang nagawa ni Sharon.

Nabalewala na ang mga pinatunayan niya, nawalan na ng saysay ang kaniyang karera na hindi lang naman niya binuo nang magdamag, napakasakit.

Mahusay ring tumayming si Attorney Sal Panelo, biglang nabuhay ang mga vlogs kung saan nito kinakana ang Sana’y Wala Nang Wakas ilang taon na ang nakararaan, kakambal ang kuwento ng namayapa nitong anak na may down syndrome.

Ano ang aasahan natin? Underdog na underdog ang abogado, iniyakan ng mga kababayan natin ang kaniyang istorya, idagdag pa na binigyan ito ng libreng publisidad ni Sharon bilang kumakandidatong senador.

Ang nangyari kay Sharon ay kapupulutan ng aral ng mga personalidad. Kung kaya namang palampasin na lang ang isang senaryo ay huwag nang bigyan pa ng panahon.

Huwag sasagot nang galit. Huwag magpo-post kapag malungkot at kulang sa tulog at pahinga para hindi sumasabit.

Kris Aquino – Asikasuhin na lang dapat ang kalusugan

Sunog na sunog si Kris Aquino nitong mga nakaraang araw hanggang ngayon. Kung iikutin natin ang mga vlogs sa You Tube ay puro siya ang laman.

Hindi gagaling agad si Kris kapag pinanood niya ang mga vlogs na siya ang bumibida, magiging dagdag-stress iyon sa kaniya, dahil puro negatibo ang laman.

May napanood kaming panayam sa isang may edad nang babae na nagpakilalang kaibigan ng mga namayapang magulang ni Kris. Maraming kuwento ang babae, hindi raw alam ni Kris ang kaniyang mga sinasabi, isinumpa raw si Kris.

Sinabi naman ng isa pang taga-Tarlac na kapanalig ni Mayor Cristy Angeles na napakadulas ng dila ni Kris sa paghuhusga kahit hindi naman niya alam ang kasaysayan ng pulitika sa kanilang probinsiya.

Sabi ng babae, “Huwag na lang kayong tumutulong kung tinutunton n’yo naman! Gagawa kayo ng isang bagay na akala namin, e, mula sa puso n’yo, pero kinukuwenta n’yo naman!

“Kapag may napansin kayong isang bagay, ipagmamakaingay n’yo na, sisingilin n’yo, nasaan ang kusang-loob na pagtulong na sinasabi n’yo? Ugaling-ugali n’yo ang ganyan!

“Ano ang utang na loob na kailangang tanawin sa inyo ni Mayor Angeles? Wala! Kahit katiting, wala! Si Mr. Danding Cojuangco ang dapat tanawan ng utang na loob ng pamilya, hindi kayo!

“Napakabilis mong magpahiya sa tao, buwisit na buwisit ka pa! Ikaw ang nakakabuwisit dahil talak ka nang talak nang hindi mo naman alam ang katotohanan!” galit na sabi ng kapanalig ng mayora ng Tarlac City.

Maging ang komedyante-TV host at kinatawan ngayon ng OWWA na si Arnell Ignacio ay bukas ang bibig sa pagpapaalala kay Kris.

“Asikasuhin mo na lang, Kris, ang kalusugan mo. Ikaw naman ang nagpo-post para malaman ng publiko na nangangailangan ka ng gamutan. Paano ka gagaling kung ganyan na ikaw naman mismo ang hindi nagmamalasakit sa katawan mo?

“Saka huwag na lang kayong tumutulong kung pagkatapos, e, sisingilin n’yo rin naman! Hindi maganda ang ganoon,” pahayag ni Arnelli.

Si Kris ang lumalapit sa apoy. Siya ang nang-iimbita ng pagkasunog. Siya ang naghahanap ng away. Kapag nakahawak na siya ng mikropono ay wala nang direksiyon ang galaw ng kaniyang dila.

Tama bang ikampanya niya sa negatibong paraan si dating Mayor Herbert Bautista? Nagpapakapagod ang aktor-pulitiko para sa pangangampanya sa pag-asang mananalo itong senador pero ano ang ginagawa ni Kris?

Kinampanya niya ang mga Kakampink na huwag iboto si Bistek dahil sayang lang daw ang kanilang boto, hindi raw marunong tumupad sa kaniyang mga pangako si Mayor Herbert, maysakit pa siya nang lagay na ‘yan.

May mga bumubulong na nga sa kaniya na huminto na sa pagsasalita, pero wala siyang pakialam, dakdak pa rin siya nang dakdak.

Ang ipinunta raw ni Kris sa rally ay para suportahan si VP Leni Robredo. Iyon ang sabi niya. Hindi ang manira ng mga taong sa kaniyang panlasa ay nakakabuwisit. Kung iyon nga ang kaniyang pakay ay hindi nakakopo ng boto si Kris para sa kaniyang minamanok, siya pa ang nambugaw palayo sa mga botante, dahil sa sobrang tabil ng kaniyang dila.

Nakakaawa naman si Kris Aquino. Maysakit na siya at pupunta pa nga sa Amerika para matunton kung saan nagmumula at nag-uugat ang kaniyang mga sakit, pero punumpuno pa rin ng galit ang kaniyang puso, nagpapaka-stress siya na ipinagbabawal sa kaniya ng mga doktor.

Pero dahil bratty nga si Kris, walang makapipigil sa kaniya, gagawin at sasabihin pa rin niya ang kaniyang gusto kahit pa makasasama iyon sa kaniyang pangkasalukuyang sitwasyong pisikal.

Carla Abellana – Maganda pero maldita na, taklesa pa

Puwede nang ibilang nayon ang pangalan ni Carla Abellana sa mga artistang taklesa. Iyong arya lang nang arya nang hindi muna nag-iisip nang maraming beses.

Maraming ibinibigay na pruweba ang mga naiinis ngayong Marites sa kaniya. Maganda lang daw si Carla pero maldita. Taklesa pa.

Sabi ng isang Marites, “Noong may faney na nagtanong sa kaniya kung becki ba si Tom Rodriguez, dahil yon ang natsitsismis, ni-like niya, di ba? Noong may nagtanong kung infidelity ba sa part ni Tom ang hiwalayan nila, ni-like din ni Carla!” naiinis nitong sabi.

At ang huling pagkataklesa ni Carla ay noong linawin niya na hindi ibinebenta ang kaniyang condo unit nang dalawang milyon lang. Ipinaliwanag niya na binawasan lan ang presyo pero hindi ibinebenta nang palugi.

Ang kaniyang huling sinabi ay isinalin pa raw niya sa Tagalog (Filipino) ang pagpapaliwanag para maraming makaintindi. Naku, nagwarla ang mga Marites sa sinabi niya, hindi lang pala siya taklesa kundi maldita pa!

Kailangang alam ni Carla na huwag sasagot kapag mainit ang ulo o galit. Huwag mangangako kapag masaya at huwag magdedesisyon kapag malungkot.

Matalino naman siya, nagtapos nga siyang Magna Cum Laude sa isang prestihiyosong kolehiyo, kaya dapat ay alam ni Carla Abellana kung saan siya lulugar.

***

Naiintindihan namin ang sitwasyong kinaroroonan ngayon ni Rey “PJ” Abellana. Damage control ang kailangan niyang gawin. Kailangan niyang bawiin ang mga una niyang deklarasyon dahil inaway siya ni Carla.

Nang malaman ng kaniyang anak ang mga salitang binitiwan niya ay nagalit ito, bakit daw siya nagsalita, tuloy ay lumala ang problema nila ni Tom Rodriguez.

Ano ang puwedeng gawin ni Rey para makabalanse sa damdamin ng nagalit niyang anak? Natural, damage control, kailangan niyang bawiin ang kaniyang mga pinakawalang impormasyon para mapagbigyan si Carla.

Pero mayroon pa bang maniniwala sa ginawang paglilinaw ni Rey? Maniniwala pa ba ang publiko sa kaniyang pagsasabing hindi naman natuloy ang one-night-stand na kinapalooban ni Tom?

Tatllong araw pa ang pinalipas ni Rey bago niya sinabing hindi naman natuloy ang one-night-stand. Sa loob nang tatlong araw na iyon ay siguradong nagkapalitan sila ng mga salita ng kaniyang anak, masasakit na salita.

Dati na namang hindi malapit si Carla sa kaniyang ama, nang maghiwalay sina Rey at Rhea ay naiwan si Carla at ang kaniyang kapatid sa poder ng nanay nila, inaasahan na ang ganitong senaryo sa pagitan ng mag-ama.

Ariel Rivera – Napagkakamalang suplado

Para kaming namamalakaya na sinuwerteng makahuli ng malaking isda kay Ariel Rivera. Naging panauhin namin siya sa Cristy Ferminute bilang bagong Jukeboss ng Sing-Galing ng TV5.

Medya-medya lang ang pagtatanong namin ni Romel Chika sa magaling na singer-actor, kilala kasi siyang mapagpahalaga sa personal niyang buhay, kaya siya napagkakamalang suplado.

Pero mukhang maganda ang gising ni Ariel noong araw na iyon, nagkuwento siya tungkol sa mga anak nila ni Geli de Belen na nag-aaral-naninirahan sa Canada, emosyonal ang mga pahayag ni Ariel bilang ama.

“Dinadalaw namin sila three times a year. Buti nga, may FaceTime na, nagkakausap kami palagi. Pero kapag pauwi na kami, masakit, malungkot, mahirap when your children are away,” sabi ni Ariel.

May nag-text para magtanong. Nagdadalawang-isip pa sana kaming itanong kay Ariel ang isyu pero siya mismo ang nagsabing handa siyang sagutin ang lahat ng tanong na ibabato sa kaniya.

Bakit nga ba siya umalis sa Lunch Out Loud? Ang LOL na naging bahagi rin siya nang mahabang panahon?

Diretsong pahayag ni Ariel, “It’s because of the budget. Luging-lugi na kasi ang producer, so instead na makadagdag pa ako sa pagkalugi, umalis na lang ako.

“I don’t want to be a burden, lugi na kasi, mas mabuting magpaalam na lang ako. Hindi na nga ako nakapagpasalamat kay Cong. Albee Benitez, thank you, sir,” paglilinaw ni Ariel.

Sa tatlong taping ng LOL nang lingguhan ay libre ang isang taping, dalawa lang ang bayad sa mga hosts, pero nagsabi uli ang produksiyon na kailangan uling bawasan ang kanilang talent fee.

Iyon ang pagkakataong umalis na si Ariel Rivera dahil naaawa na siya sa malaking pagkalugi ng producer. Para makagaan ang produksiyon, para hindi na madagdagan pa ang sobra-sobrang gastos, pero napakaliit lang ng balik.

Sen. Manny Pacquiao – Ipinahamak ang sarili

Hay, ipinahamak ni Senador Manny Pacquiao ang kaniyang sarili sa panayam sa kaniya nina Ted Failon at DJ Chacha sa Radyo Singko at OnePH.

Sabi niya ay may mga kasamahan daw siyang senador na hindi pumipirma at sumasang-ayon sa maraming batas na kailangang pairalin sa ating bayan dahil sa kanilang mga personal na interes.

Nalulungkot daw siya dahil maraming batas na makabubuti pero hindi pumapasa dahil nga sa pinaiiral na personal at pailalim na interes ng kaniyang mga kasamahan sa Senado.

Natural, binulabog niya ang mga tagapakinig-tagapanood sa kaniyang sinabi, kaya hinamon siyang pangalanan kung sinu-sinong senador ang may vested interest.

Ang kaniyang sagot ay pabayaan daw munang sumailalim sa due process ang mga senador na gusto niyang tukuyin, ang malinaw raw ay ipakukulong niya ang mga pulitikong corrupt kapag siya ay nanalo, tutuparin daw niya ang kaniyang pangako laban sa mga nagnanakaw sa kaban ng ating bayan.

Si Senador Ping Lacson daw ang napipisil niyang manalo sa panguluhan labas sa kaniyang sarili. Ayaw na niyang pangalanan pa kung sinu-sino ang ayaw niyang makakuha sa pinakamataas na upuan, tama na raw na sinabi niyang si Senador Ping Lacon ang gusto niyang manalo, tapos!

Gusto po naming magtawid ng pasasalamat nina Romel Chika at Morly Alinio ng pinakamasarap na pasasalamat sa mga kababayan nating napakabilis na yumakap at nagbigay tiwala sa “Showbiz, Now Na!”

Lumalangoy po sa kaligayahan ngayon ang buong produksiyon ng aming You Tube Channel, kulang ang mga salita lang ng pasasalamat para ibalik sa napakaaga naming mataas na subscribers at views, maraming-maraming salamat po sa inyong suporta, tiwala at pagmamahal. – CSF