 |
Gusto mo bang maging Consul?
|
As of press time, wala pang Honorary Consul ang Winnipeg. Para makasiguro, bago ko ginawa ang article na ito ay binisita ko ang website ng Philippine Consulate General ng Toronto upang kumpirmahin ito. Totoo nga, ang nakalagay sa webpage nila ay “vacant.”
Kaya, ito ang tanong: gusto mo bang maging Consul? Kung “oo” ang sagot, heto ang isang mas mahalagang tanong: alam mo ba kung anu-ano ang mga katungkulan ng isang Honorary Consul?
Ayon sa Philippine Consulate Office:
Consular services include issuance of passport; extension validity of green passports/affidavit; travel document; issuance of visa; requirements for retention and re-acquisition of Philippine Citizenship; notarial and legal services; registration of nationals; report of marriage, birth and death; collection of income tax and balikbayan stamp.
Karapatan ng bawat Pilipino na nasa ibang bansa ang mabigyan ng ganitong uri ng serbisyo mula sa Gobyerno ng Pilipinas sa pamamagitan ng mga Tanggapan ng Konsulado.
Republic Act No. 7157, otherwise known as Philippine Foreign Service Act of 1991 gives mandate to the Department of Foreign Affairs to implement the three (3) pillars of the Philippine Foreign Policy, as follows:
-
Preservation and enhancement of national security
-
Promotion and attainment of economic security
-
Protection of the rights and promotion of the welfare and interest of Filipinos overseas.
Base sa nabanggit na foreign policy partikular ang number 3, masasabi kong ang pagiging Consul or Honorary Consul ay may malaking responsibilidad para sa kapakanan ng mga Pilipino na naninirahan sa labas ng Pilipinas. Sa aking palagay, hindi biro ang katungkulang ito.
Bakit mo gustong maging Honorary Consul?
Sa kabila ng bigat ng mga tungkuling nakaatang sa pagiging Honorary Consul ng Winnipeg ay maraming Pilipeggers (Pilipinong-Winnipegers) ang nagkakandarapa para makuha ang posisyong ito. Diumano, kaniya-kaniyang padrino ang ginagamit ng mga aspirants para mabigyan ng basbas mula sa Malacañang. Ginagamit ang political connection, kamag-anak connection, fraternity connection, utang-na-loob connection at kung anu-ano pang “-tion.”
Para sa mga taong naglalaway para maging Honorary Consul ng Winnipeg, kayo ba ay totoong may puso para maglingkod sa kapuwa n’yo Pilipino? Hindi n’yo ba gagamitin ang posisyong ito para sa title o yabang lamang? Mayroon ba kayong pino-protektahang negosyo, kapangyarihan o political affiliation kaya gusto ninyong maging Honorary Consul? O talagang suwapang lang kayo sa kapangyarihan at gusto n’yong ma-control ang buong Pilipino sa Winnipeg? Maglilingkod ba kayo nang may katapatan, kasipagan at ipakikita ang inyong sinseridad at commitment para sa mga Pilipino sa Winnipeg?
Alam kong sarcastic ang aking mga tanong, pero kung talagang walang masamang intensyon ang sinumang nag-aaspire na maging Honorary Consul natin ay hindi siguro siya masasaktan. Kung nasaktan ka man sa aking mga tanong, palagay ko ay guilty ka!
Noong unang mahalal si Lito Taruc bilang PCCM President ay sinabi niya sa kaniyang speech na maglalaan ang PCCM ng lugar para maging opisina ng Honorary Consul. Siguro ay nakahanda na ang office at naghihintay na lamang na matalaga kung sino man ang mapalad.
Sana ang mahirang na Honorary Consul ng Winnipeg ay yung tao na talagang naangkop para sa katungkulang ito.
Sa magiging Honorary Consul ng Winnipeg, huwag po sana ninyong gawing komplikado ang mga bagay lalo na sa pag-de-deliver ng public service. Ibig sabihin, pabilisin po sana natin ang proseso at magkaroon ng maayos na sistema.
Hindi natin kailangan ang sobrang matalino, pogi, maganda o popular na tao bilang Honorary Consul. Ang kailangan natin ay taong may puso para sa paglilingkod. Isang tao na kasabay nating magtataguyod ng karapatan ng bawat migranteng Pinoy.
Ikaw na ba yun?
Source:
www.philcongen-toronto.com
Si Noel Lapuz ay dating OFW sa Middle East (Dubai at Qatar). Nagtrabaho nang sampung taon sa City Hall ng Taguig bilang Human Resource Management Officer. Naging bahagi ng Bata- Batuta Productions bilang manunulat, entertainment host at stage actor. Nagtatag ng Kulturang Alyansa ng Taguig. Kasapi ng Ecumenical Movement for Justice and Peace (EMJP).
Have a comment on this article? Send us your feedback |
